قاڭتار وقيعاسىنا قاتىستى ناقتى قانشا ادام سوتتالعانى بەلگىلى بولدى
بۇل تۋرالى ق ر باس پروكۋراتۋراسى ارنايى پروكۋرورلار قىزمەتى باستىعىنىڭ ورىنباسارى نۇرلىبەك ءسابيتوۆ ايتتى، دەپ حابارلايدى قازاقپارات ءتىلشىسى.
«قاڭتارداعى وقيعالار بويىنشا سوتقا بارلىعى 474 قىلمىستىق ءىس جولداندى، ولار بويىنشا 717 ادام سوتتالدى. مەملەكەت باسشىسىنىڭ اۋىرلاتاتىن ءمان-جايلار بولماعان كەزدە جازانى جەڭىلدەتۋ جونىندەگى تاپسىرماسىن ورىنداۋ ماقساتىندا پروكۋرورلار سوتتاردى باس بوستاندىعىنان ايىرۋعا بايلانىستى ەمەس جازالاردى تاعايىنداۋعا باعىتتاۋدا»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.
تاراز قالاسى سوتىنىڭ ۇكىمىمەن جامبىل وبلىستىق پوليتسيا دەپارتامەنتىنەن ۇرلانعان «ماكاروۆ»، «ستەچكين» جۇيەسىنىڭ جاۋىنگەرلىك تاپانشالارىن جانە وق-دارىلەردى ساقتاعانى جانە تاسىمالداعانى ءۇشىن جەرگىلىكتى تۇرعىن سوتتالدى.
اتالعان ازامات ءوز كىناسىن مويىنداپ، جاساعان ىسىنە وكىنىپ، سوتقا دەيىنگى تەرگەۋ كەزىندە تەرگەۋ ورگاندارىنا كومەك كورسەتتى.
«وسى جاعدايلاردى ەسكەرە وتىرىپ، وعان ەكى جىل شەكتەۋ تۇرىندەگى جازا تاعايىندالدى. قارۋدى ۇرلاۋمەن جانە ساقتاۋمەن بايلانىستى اۋىر قىلمىس جاساعان، زالالدى وتەمەگەن جانە وتەلمەگەن سوتتىلىعى بار 92 سوتتالۋشى باس بوستاندىعىنان ايىرۋدىڭ ناقتى مەرزىمىن الدى. قالعان قىلمىستىق ىستەر بويىنشا تەرگەۋ ورگانى داۋسىز دالەلدەردى جيناۋ جانە بارلىق قاتىسى بار ادامداردى قىلمىستىق جاۋاپتىلىققا تارتۋ بويىنشا جان-جاقتى جۇمىس جۇرگىزىپ جاتىر. جۇمىستىڭ نەگىزگى كولەمى جاپپاي تارتىپسىزدىكتەر مەن تەرروريزم اكتىلەرى بويىنشا جۇرگىزىلۋ ۇستىندە. مىڭنان استام ادام ىستەر بويىنشا كۇدىكتى رەتىندە تانىلدى. ارقايسىسىمەن جاۋاپ الۋ، بەتتەستىرۋ، ايعاقتاردى ورنىندا تەكسەرۋ جانە ناقتىلاۋ سياقتى جانە باسقادا كەشەندى تەرگەۋ ارەكەتتەرى جۇرگىزىلۋدە»، - دەدى باس پروكۋراتۋرا وكىلى.
نۇرلىبەك ءسابيتوۆتىڭ دەرەگىنشە، تەك ارنايى پروكۋرورلاردىڭ ىستەرى بويىنشا 40 مىڭنان استام تەرگەۋ ارەكەتتەرى جۇرگىزىلدى. ساراپتامالىق ۇيىمداردىڭ وندىرىسىندە 4 مىڭنان استام زەرتتەۋلەر بار.
«مىندەتتى تەرگەۋ ارەكەتتەرى قىلمىستارعا ءار قاتىسۋشىسىنىڭ ءرولىن انىقتاۋ، ونىڭ ارەكەتتەرىن وبەكتيۆتى باعالاۋ جانە زاڭدى پروتسەستىك شەشىم قابىلداۋ ءۇشىن جاسالادى. قىلمىستىق قۋدالاۋ ورگاندارى تولىق، وبەكتيۆتى جانە جان-جاقتى تەرگەۋ جۇرگىزۋ ءۇشىن بارلىق كۇشتەر مەن قۇرالداردى جۇمىلدىرۋدا»، - دەدى ول.
