الماتىدا ەر ادام جەدەل جاردەم كولىگىن ۇرلاپ كەتتى
الەۋمەتتىك جەلىدە پوليتسەيلەردىڭ جەدەل جاردەم كولىگىن ۇستاعان ۆيدەو تارادى. الماتى پوليتسياسىنا، الدىمەن، 31- شىلدە كۇنى كەشكى ساعات 21.45-تە قۇلجا تاسجولىنىڭ بويىنداعى تۇرعىن ءۇي كەشەنىنىڭ اۋماعىنان «BMW» كولىگى ۇرلانعانى تۋرالى حابارلاما تۇسكەن. تۇرعىن ءۇي كەشەنىنەن شىعا بەرگەندە كولىك ۇرلاۋشى «اۋدي» كولىگىمەن سوقتىعىسىپ، وقيعا ورنىنان قاشىپ كەتكەن. كوپ ۇزاماي ەسىك قالاسىندا قارسى جولاققا شىعىپ كەتىپ، «Toyota» كولىگىمەن سوقتىعىسقان. ول جەردە كولىكتى تاستاپ، جاياۋ بوي تاسالاۋعا تىرىسقان. كوپ ۇزاماي كۇدىكتى ءبىر بويجەتكەنىڭ «Nissan» كولىگىن تارتىپ الىپ قاشپاق بولعاندا، اۋدارىلىپ قالدى. وقيعاعا كۋا بولعاندار جەدەل جاردەم شاقىرعان كەزدە ەر ادام مەديتسينالىق بريگادا كولىگىن دە ۇرلاپ كەتكەن. «وبلىستىق جەدەل جاردەم قىزمەتىنە تيەسىلى «Jac Sunray» كولىگىمەن ول قالاعا قايتا كەلگەندە پاترۋلدىك پوليتسيا ەكيپاجى «ۇستاپ الۋ» جوسپارى بويىنشا قولعا ءتۇسىردى. كۇدىكتى - 1994 -جىلى تۋعان ەر ادام، مەديتسينالىق كۋالاندىرۋ بارىسىندا ەسىرتكى تۇتىنعانى انىقتالدى»، - دەپ حابارلادى پوليتسيادان.
مەدەۋ اۋداندىق پوليتسيا باسقارماسىندا، سونداي- اق ەڭبەكشىقازاق اۋداندىق پوليتسيا بولىمشەسىندە بوتەن كولىكتەردى زاڭسىز باسىپ الۋ دەرەكتەرى بويىنشا ءۇش قىلمىستىق ءىس تىركەلدى. سونىمەن قاتار ءۇش جول كولىك وقيعاسى بويىنشا رەسمي ءىس قوزعالدى. وقيعانىڭ ءمان- جايى انىقتالىپ جاتىر.
اۆتور الما مۇقانوۆا
