وزگە ەلدەردە شەت ءتىلى قالاي وقىتىلادى؟

نۇر- سۇلتان. قازاقپارات - فرانسۋز بالالارى مەكتەپ تابالدىرىعىن اتتاي سالا، شەت ءتىلىن ۇيرەنۋگە كىرىسەدى. جالپى فرانسيادا وزگە تىلدەردى مەڭگەرۋگە باسا ءمان بەرىلگەن.

بۇگىندە مەكتەپ وقۋشىلارىنىڭ 90 پروتسەنتى اعىلشىن ءتىلىن وقيدى. 90 -جىلداردىڭ اياعىنا دەيىنگى باعدارلامادا وعان جاي عانا كىرىسپە جاسالاتىن. بۇگىندە باستاۋىش سىنىپتاردا اعىلشىن ءتىلىن اپتاسىنا 1,5 ساعات وقىتىلادى، دەپ حابارلايدى «حابار 24».

ال ورتا جانە جوعارى سىنىپتاعىلار ءۇشىن بۇل ءپان جيىرەك وتكىزىلەدى. ءسويتىپ، مەكتەپ بىتىرگەنشە وقۋشى ءتىلدى ورتا جانە ودان جوعارى دەڭگەيدە مەڭگەرىپ شىعادى.

اسەل قۋانبايەۆا، ەكى بالانىڭ اناسى:

- باستاۋىش مەكتەپتە نەگىزىنەن انا ءتىلى مەن ماتەماتيكاعا كوپ ءمانى بەرىلەدى. قالعان پاندەر تەك كىرىسپە ساباق رەتىندە وقىتىلادى. مىسالى اعىلشىن ءتىلى سولاي. ول فاكۋلتاتيۆتى ساباق رەتىندە وتەدى. مۇندا باعا قويىلمايدى، ءبىراق باستاۋىش مەكتەپتى بىتىرگەن بالا نەگىزگى اعىلشىن سوزدەرىن ءبىلۋى مۇمكىن. ءبىراق گرامماتيكانى وتپەيدى. ونىسى ورتا بۋىندا وقىتىلا باستايدى.

ەسكەرە كەتەتىن ءبىر جايت بار: بەسىنشى رەسپۋبليكادا ەكى شەت ءتىلىن وقىتۋ مىندەتتەلگەن. وقۋشى قالاسا، ءۇشىنشىسىن دە وقي الادى.

ال، تۇركيادا شەت ءتىلى 2-سىنىپتان باستاپ وقىتىلادى. وقۋشىلاردىڭ فرانسۋز، اراب، نەمىس، ورىس ءتىلى ءپانىن تاڭداۋ مۇمكىندىگى بار. ءبىراق باسىم بولىگىنىڭ تاڭداۋى اعىلشىن تىلىنە تۇسەدى. ەل ازاماتىنىڭ ءبىرىنشى مىندەتى - مەملەكەتتىك ءتىلدى جەتىك مەڭگەرۋ بولعاندىقتان، ساباقتاردىڭ ءبارى تۇرىك تىلىندە وتەدى. ال، جوعارعى وقۋ ورىندارىنىڭ اعىلشىن تىلىندەگى بولىمىنە تۇسەتىندەر ارنايى سىناقتان وتۋگە مىندەتتى.

چەتين باشەر، انكارا تۇرعىنى:

- بالا الدىمەن انا ءتىلىن ءبىلۋى ءتيىس. باسقا تىلدەردى، سول ءتىلدىڭ ايناسىنان قاراعانى ءجون. تۇلعا بولىپ قالىپتاسپاي، ۇلتى مەن مەملەكەتىن تانىماي باسقا ءتىلدى ۇيرەنگەنى دۇرىس ەمەس. ماسەلەن، مەنىڭ جيەندەرىم نيدەرلاندىدا تۇرادى. الدىمەن، تۇرىك ءتىلىن مەڭگەردى. سوسىن، اعىلشىن، فرانسۋز تىلدەرىن ۇيرەندى.

قىتايدا 12 جىلدىق ورتا ءبىلىم بەرۋ جۇيەسى قالىپتاسقان. ونىڭ العاشقى التى جىلى باستاۋىش مەكتەبىندە وتەدى. مۇنداعى شەت ءتىلى ءپانى رەتىندە اعىلشىن ءتىلى وقىتىلادى. ايتا كەتەرلىگى، قىتاي قالالارى ەكونوميكالىق دامۋ قارقىنىنا قاراي جىكتەلەدى. سوندىقتان بەيجىڭ، شاڭحاي، گۋاڭجوۋ سىندى مەگاپوليستەر مەن تاعى 15 ءىرى شاھاردا اعىلشىن ءتىلى ءبىرىنشى سىنىپتىڭ باعدارلاماسىنا ەنگىزىلگەن. ال، ەلدى- مەكەن مەكتەپتەرىندە ونى ءۇشىنشى سىنىپتان باستاپ ۇيرەتەدى. جاڭا ەرەجەگە سايكەس، باعدارلامانىڭ العاشقى ەكى جىلىندا ەمتيحان مەن باعالاۋ جۇيەسى قاراستىرىلماعان. ءتىلدى تەرەڭدەتىپ وقىتۋ تەك ءۇشىنشى جىلدان عانا باستالادى. ارالىق باقىلاۋدان بولەك، تەست تۇرىندەگى ەمتيحان جارتى جىلدا ءبىر رەت وتكىزىلەدى.

اننا حۋ، باستاۋىش سىنىپ وقۋشىسىنىڭ اناسى:

- مەنىڭ ويىمشا، قىتايلىق ءبىلىم بەرۋ جۇيەسى نەگىزىنەن بولاشاق پەرسپەكتيۆاعا باسىمدىق بەرەدى. تۇجىرىمداماسى باستاۋىش سىنىپ وقۋشىلارىنىڭ قاجەتتىلىگىنە تولىق ساي كەلەدى. مۇنداعى ءبىلىم ستاندارتى، ساپاسى مەن ونى باقىلاۋ وتە جوعارى. قازىر ءۇي تاپسىرماسىنىڭ جۇكتەمەسىن ءبىرشاما ازايتىپ، كوبىرەك دەنە شىنىتىرۋعا ءمان بەرە باستاعان.

بىلتىردان باستاپ ءبىلىم باعدارلاماسىنىڭ جۇكتەمەسى ءبىرشاما جەڭىلدەتىلگەن. ماسەلەن، باستاۋىشتىڭ ءبىرىنشى، ەكىنشى سىنىبىنان جازباشا ەمتيحان ەندى الىنبايدى. جوعارى سىنىپتاردا دا مۇنداي ەمتيحاننىڭ سانى قىسقارعان. جالپى، قىتايدا ءبىلىم بەرۋ باعدارلاماسى وقۋشىنىڭ جوعارى وقۋ ورنىنا تۇسۋگە دايارلىق رەتىندە قاراستىرىلادى. ال، اتا- انالار بالاسىن جاستايىنان دايىنداۋعا كىرىسەدى.

www.24.kz