حالىقارالىق ارميا ويىندارى تامىزدا قازاقستاندا وتەدى

نۇر- سۇلتان. قازاقپارات - تامىز ايىندا ەلىمىزدە حالىقارالىق ارميا ويىندارى اياسىندا «تاكتيكالىق مەرگەن» كونكۋرسى باستالادى.

ءار ەلدەن كەلگەن اسكەري قىزمەتشىلەر جاۋىنگەرلىك شەبەرلىگىن جەكە جانە توپ قۇرامىندا كورسەتىپ، وق اتۋدان جارىسادى. سونداي- اق قازاقستاندىق اسكەري قىزمەتشىلەر كاباردين- بالقارداعى تەرىسكول كەنتى ماڭىندا تاۋ بولىمشەلەرى اراسىندا وتەتىن «ەلبرۋس شەڭبەرى» كونكۋرسىنا قاتىسادى.

ەكى كونكۋرستىڭ شارتتارى مەن ەرەكشەلىكتەرى جايىندا قارۋلى كۇشتەر ارنايى وپەراتسيالار قولباسشىسىنىڭ ورىنباسارى، پولكوۆنيك اباي ابدۋللايەۆ تولىعىراق ايتىپ بەردى.

- اباي ساۋمەن ۇلى، تامىز ايىندا ەل اۋماعىندا حالىقارالىق ارميا ويىندارى اياسىندا «تاكتيكالىق مەرگەن» سايىسى وتەدى. ويىندار قالاي جانە قاي جەردە وتەدى، ونىڭ شارتتارى قانداي؟

- 2022 -جىلى ارميا حالىقارالىق ويىندارى شەڭبەرىندەگى «تاكتيكالىق مەرگەن» سايىسى وسى جىلى قاراعاندى وبلىسىنداعى «سپاسسك» وقۋ- جاتتىعۋ پوليگونىندا وتەدى. بەكىتىلگەن ەرەجە جانە ءتارتىپ بويىنشا كونكۋرسقا قاتىسۋشى ەل نەگىزگى توپ رەتىندە ون ادامدى تاعايىنداپ، ونىڭ ىشىندە ءار ءتۇرلى ماماندارمەن بىزگە جىبەرۋ كەرەك. شارت بويىنشا قاتىسۋشى ەل ون ادامدى ىرىكتەپ جىبەرگەننەن كەيىن، ولار ءتورت كونكۋرستىڭ اياسىندا وتكىزىلەتىن ءتورت كەزەڭگە قاتىسۋعا دايىن بولۋى كەرەك.

ءبىرىنشى كەزەڭ بارىسىندا جەكە دارا دايىندىعى تەكسەرىلەدى. ءار مەرگەن قىسقا مەرزىم ىشىندە نىسانانى ايقىنداي ءبىلۋى جانە ونى جويا ءبىلۋى كەرەك. ەكىنشى كەزەڭ بارىسىندا، جاۋىنگەرلىك جۇپتاردىڭ ءوزارا ءىس- قيمىل جاساي ءبىلۋ دەڭگەيى تەكسەرىلەدى. ءۇشىنشى كەزەڭ بارىسىندا توپ قۇرامىندا ءىس- قيمىل جاساۋ كەرەك. ءتورتىنشى كەزەڭ - كونكۋرستىڭ ەرەجەسىنەن تىس «دۋەل» اتتى سىناق.

- بايقاۋ ەرەجەسى مەن كريتەريلەرى جايلى ايتىپ وتسەڭىز.

- بەكىتىلگەن ەرەجە بويىنشا ءتورت كەزەڭنىڭ بارىسىندا ەڭ اۋەلى قاۋىپسىزدىك شارالارىنا باسا نازار اۋدارىلادى. ودان كەيىن جاعدايدى تەز سىناپ، نىسانانى بەلگىلەپ، ونى جويۋ كەزىندە نەعۇرلىم از ۋاقىت جۇمساسا، سوعۇرلىم ۇپايى جوعارى بولادى. كونكۋرستى اشىق وتكىزۋ جانە باعا بەرۋ ءۇشىن اكىمشىلىك جانە تورەشىلەر بەكىتىلگەن.

- «تاكتيكالىق مەرگەن» سايىسىنا قاتىستىن ەلدەردى ايتىپ وتسەڭىز.

- بۇل سۇراققا جاۋاپ بەرمەس بۇرىن، تاريحىنا ۇڭىلسەك. «تاكتيكالىق مەرگەن» سايىسى ارميالىق حالىقارالىق ويىندارى اياسىندا وتكىزىلىپ جاتقان ەكىنشى كونكۋرس. ءبىرىنشى رەت وتكەن جىلى رەسەي فەدەراتسياسىنداعى ريازانداعى وقۋ- جاتتىعۋ پوليگونىندا وتكىزىلگەن بولاتىن. ول جەردە ءبىزدىڭ قۇراما ءۇشىنشى ورىن العان. وسى جىلى قازاقستان رەسپۋبليكاسىندا وتكىزۋ تۋرالى شەشىم قابىلدانعاننان بەرى 12 ەل نيەت ءبىلدىردى. ونىڭ ىشىندە ورتا ازيا ەلدەرىنان اتاپ وتسەك وزبەكستان، تاجىكستان جانە ءوزىمىزدىڭ قازاقستان رەسپۋبليكاسى. ودان بولەك رەسەي فەدەراتسياسىنىڭ قۇراماسى، قىتاي حالىق رەسپۋبليكاسى جانە مالي، نيكاراگۋا سياقتى ەلدەر نيەتتەرىن بىلدىرگەن.

- اباي ساۋمەن ۇلى، قازاقستاندىق اسكەري قىزمەتشىلەردە تاۋ بولىمشەلەرى اراسىندا وتەتىن «ەلبرۋس شەڭبەرى» كونكۋرسىنا قاتىساتىنى بارىنە ءمالىم. وسى بايقاۋ تۋرالى تولىعىراق ايتىپ كەتسەڭىز.

- 2016 -جىلدان بەرى ارميا حالىقارالىق ويىندارى شەڭبەرىندە وتكىزىلىپ وتىرعان «ەلبرۋس شەڭبەرىنە» وسى جىلدى قوسىپ ساناساق التىنشى رەت قاتىسۋدامىز. 6 جىلدان بەرى ءبىزدىڭ قۇراما جۇلدەلى ورىنداردى يەلەنىپ كەلەدى. قۇراما ىرىكتەۋدەن وتكىزىلىپ، الماتى وبلىسىندا ورنالاسقان تاۋ دايىندىعى ورتالىعىندا بۇگىنگى كۇندە كونكۋرسقا قاتىسۋعا دايىن. نيەت بىلدىرۋشىلەر سانى وسى جولى توعىزدان استام. سايىستىڭ ەرەجەلەلەرى بويىنشا قۇرامانىڭ توبى 20 ادام بولۋى كەرەك. ونىڭ نىگىزگى توبى 12، قوسالقى توبى 8 ادام بولۋى كەرەك. سول توپتار ايقىندالعاننان كەيىن، رەسەي فەدەراتسياسىندا ورنالاسقان كاباردين- بالقاردارەسپۋبليكاسىنداعى تاۋ دايىندىعى ورتالىعى «تەرىس كولگە» جونەلتۋگە دايىنبىز.

- جاڭاعى ايتىپ وتكەن كونكۋرستارعا قاتىساتىن ءبىزدىڭ اسكەري قىزمەتشىلەر بۇدان قانداي تاجىريبە الادى؟

- ورىندى سۇراق. ءبىزدىڭ قارۋلى كۇشتەرىنىڭ وكىلدەرى ونىڭ ىشىندە ماماندارىمىز، ارنايى وپەراتسيا قولباسشىلارى جانە باسقادا قاتىسۋشىلار ءبىرىنشى ورىندا حالىقارالىق ىنتىماقتاستىقتى ارتتىرۋ ماقساتىن ورىندايدى. كورشى ەلدەردىڭ قارۋلى كۇشەترىمەن تاجىريبە الماسادى. سونىمەن قاتار، وتاندىق قورعانىس ونەركاسىپ ونىمدەرىن قولدانا ءبىلۋ تاجىريبەسىن ايقىندايدى.

- ال، ەندى قازاقستان قارۋلى كۇشتەرى كوماندالارىنىڭ دايىندىق دەڭگەيىنە كەلسەك، وعان قانداي باعا بەرەر ەدىڭىز؟ جالپى ءبىزدىڭ جاۋىنگەرلەردىڭ ىرىكتەۋ جانە دايىندىق پروتسەسى قالاي ءوتىپ جاتىر؟

- ەكى كونكۋرس تۋرالى ايتاتىن بولساق، جوعارىدا ايتىپ وتكەندەي «ەلبرۋس شەڭبەرى»، «تاكتيكالىق مەرگەن» كونكۋرستارىنا قاتىسۋ ءۇشىن وتە كۇردەلى جانە كەشەندى ىرىكتەۋدەن وتكىزدىك. ول ءبىر كۇن ەمەس، ءبىر اي ەمەس، بىرنەشە ايدا ءبىزدىڭ جاۋىنگەرلەر ءوز اسكەري بولىمىنەن جەكە دارا بولىپ، جەڭىپ شىقتى. ودان كەيىن وڭىرلىك قولباسشىلىقتاردىڭ اۋماعىندا وتكىزىلگەن كونكۋرستاردا جەڭىپ، بۇگىندە حالىقارالىق كونكۋسقا قاتىسۋعا دايىن.

رەداكتور جانات قاپالبايەۆا