ماحامبەت اۋدانىنىڭ اكىمى جايىق وزەنىنە باتىپ كەتتى

اتىراۋ. قازاقپارات - اتىراۋ وبلىسى ماحامبەت اۋدانىنىڭ اكىمى جايىق وزەنىنە باتىپ كەتتى، دەپ حابارلايدى قازاقپارات.

بۇل دەرەكتى ماحامبەت اۋدانىنىڭ اكىمدىگى مەن وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبى راستادى. وقىس وقيعا تۋرالى دەپارتامەنتتىڭ ديسپەتچەر پۋلتىنە 31- شىلدەدە جەرگىلىكتى ۋاقىتپەن ساعات 22:38-دە حابار بەرىلگەن.

ماحامبەت اۋدانىنىڭ اكىمى رينات جانقىلىش ورتاقشىل اۋىلىنىڭ تۇسىندا جايىق وزەنىنە سۋعا تۇسكەن. ءبىراق سۋدان كەرى شىقپاي قالعان. وقيعا ورنىنا دەپارتامەنتتىڭ جەدەل قۇتقارۋ جاساعىنان 3 سۇڭگۋىر ىزدەۋ جۇمىسىنا كىرىستى. ازىرگە سۋعا كەتكەن اكىمنىڭ دەنەسى تابىلعان جوق.

رينات جانقىلىش ماحامبەت اۋدانىنىڭ اكىمى لاۋازىمىنا 2021 -جىلعى اقپان ايىندا تاعايىندالعان ەدى. ول 1982 -جىلى 2 -جەلتوقساندا اتىراۋ قالاسىندا دۇنيەگە كەلگەن. ءبىلىمى جوعارى، 2003 -جىلى قازاق مەملەكەتتىك زاڭ ۋنيۆەرسيتەتىندە، 2011 -جىلى جامبىل گۋمانيتارلىق- تەحنيكالىق ۋنيۆەرسيتەتىندە، ال 2017 -جىلى اتىراۋ مۇناي- گاز ۋنيۆەرسيتەتىندە زاڭگەر، ەكونوميست جانە مۇناي- گاز ءىسى ماماندىعى بويىنشا ءبىلىم العان.

ەڭبەك جولىن 2005 -جىلى الماتى قالالىق ەكونوميكالىق جانە سىبايلاس جەمقورلىققا قارسى كۇرەس دەپارتامەنتىندە تەرگەۋشى بولىپ باستاعان. 2006-2018 -جىلدارى بىرنەشە جەكە كاسىپورىندا باسشىلىق ەتكەن. ال، 2018-2019 -جىلدارى اتىراۋ قالاسى ءماسليحاتىنىڭ حاتشىسى، 2019-2020 -جىلدارى اتىراۋ قالاسى اكىمىنىڭ ورىنباسارى لاۋازىمىن اتقارعان.

فوتو: gov.kz