دوپينگ قولدانعان قازاق سپورتشىسى ءتورت جىلعا فۋتبولدان شەتتەتىلدى
قازاقستان دوپينگكە قارسى ورتالىعىنان ءمالىم ەتكەنىندەي، مامىر ايىندا ايبول ابىكەننىڭ اعزاسىنان تىيىم سالىنعان مەلدونيي (ميلدرونات) پرەپاراتى تابىلعان بولاتىن.
وسىلايشا، ا. ابىكەن كاسىبي فۋتبولعا 2026 -جىلدىڭ 29-ساۋىرىندە عانا، وتىز جاسقا جاقىنداعاندا ورالا الادى. بيىلعى ماۋسىمدا جالگەرلىك قۇقىعىمەن پاۆلودارلىق «اقسۋ» قۇرامىندا 7 ماتچ وتكىزىپ، 3 گول سوقتى، 1 ناتيجەلى پاس بەردى. ايبول - الماتىلىق «قايراتتىڭ» تۇلەگى، ونىڭ ويىنشى رەتىندەگى قۇقىعى وسى كومانداعا تيەسىلى.
فۋتبولشى قازاقستان قۇراماسى ساپىندا 14 ماتچتا البانيا قاقپاسىنا 1 گول سوقتى. وسىمەن ءۇش جىلعا جەتپەيتىن مەرزىم ىشىندە دوپينگ تابىلعان قازاقستان قۇراماسىنىڭ ءۇش ويىنشىسى فۋتبولدان شەتتەتىلدى. 2020 -جىلدىڭ كۇزىندە ب ا ءا-نىڭ «ال- اين» كومانداسىندا دوپ تەپكەن باۋىرجان يسلامحان، ال وتكەن جىلى كۇزدە «توبىلدىڭ» جارتىلاي قورعاۋشىسى رۋسلان ۆاليۋللين ەكى جىل مەرزىمگە فۋتبول ويناۋ قۇقىعىنان ايىرىلدى.
ەسكە سالا كەتەيىك، بۇدان بۇرىن « قىزىلجار» - «اقجايىق» ماتچىنىڭ پەتروپاۆلدان ەلورداعا اۋىستىرىلعانىن جازعان بولاتىنبىز. بۇل ماتچ بۇگىن «استانا ارەنا» ستاديونىندا ەلوردا ۋاقىتىمەن ساعات 15.00-دە باستالادى.
