قازاقستاننىڭ بۇكىل ايماقتارىنىڭ تىنىس-تىرشىلىگىن تانىستىراتىن كورمە وتەدى

اقتاۋ. قازاقپارات - قازىرگى تاڭدا كورمەگە دايىندىق جۇمىستارى ءجۇرىپ جاتىر.

بۇل تۋرالى ماڭعىستاۋ وبلىستىق قوعامدىق كوممۋنيكاتسيا ورتالىعىندا وتكەن بريفينگتە قوعام قايراتكەرى، جازۋشى جان اقجانوۆ حابارلادى.

سپيكەردىڭ ايتۋىنشا، كورمە 18-قىركۇيەكتە نۇر-سۇلتان قالاسىنان باستاۋ الىپ، قازاقستاننىڭ بارلىق وبلىسىندا جالعاسادى.

- بارشامىزعا بەلگىلى، ءبىزدىڭ ەلىمىز الەمدەگى ەڭ ۇلكەن 10 ەلدىڭ قاتارىندا. جەرىمىز قانداي كەڭ، بايتاق بولسا، حالقىمىز بەن تابيعاتىمىز دا سان الۋان، باي كولوريتتى. جوبانى ۇيىمداستىرۋداعى ماقساتىم - ءار ءوڭىردىڭ كورىكتى، تاريحي جەرلەرىن، ەڭبەك ادامدارىن فوتوسۋرەتتەر ارقىلى باسقا ايماقتارعا تانىستىرۋ. سونىمەن بىرگە، حالىقتىڭ ءوز ەلىنە، جەرىنە دەگەن سۇيىسپەنشىلىگىن ارتتىرۋ. كورمەگە كەلگەن تۇرعىندار ەلىمىزدىڭ ءار اۋماعىمەن تانىسپاق. قازىرگى تاڭدا جوبانىڭ دايىندىق جۇمىستارى باستالىپ كەتتى، - دەدى جان اقجانوۆ.

سپيكەردىڭ ايتۋىنشا، ءار وڭىردەن جينالعان فوتوسۋرەتتەردى قوسا ەسەپتەگەندە، 300-دەي فوتو جينالماق. ءارى قاراي سۋرەتتەر ىرىكتەۋدەن ءوتىپ، كورمەدە 70-تەن استام فوتوسۋرەت قويىلادى. سونداي-اق، كورمەگە مەملەكەتتىك قىزمەتشىلەردىڭ يميدجىن ارتتىرۋ ماقساتىندا تۇسىرىلگەن فوتولار دا بولادى.

سونىمەن قاتار، كورەرمەندەر ءار فوتوسۋرەتتىڭ جانىنداعى QR كودقا ۇيالى تەلەفون كامەراسىن اپارۋ ارقىلى، سۋرەتتەگى بەينە جونىندە تولىقتاي اقپارات الا الادى. كورمەگە فوتوسۋرەتتەردى جيناۋ 4-شىلدە كۇنى اتىراۋ قالاسىندا باستالىپ، شىمكەنت، تاراز، قىزىلورادا وبلىسىندا بولعان. وندا كيەلى ەسكەرتكىشتەردەن باستاپ، عارىش ايلاعى، ءارتۇرلى سالا ماماندارى مەن كورىكتى جەرلەردى تۇسىرگەن. ءبىزدىڭ وڭىرىمىزدە دە بەكەت اتا جەر استى مەشىتىنەن باستاپ، وبلىستىق كىتاپحانا مەن مۋزەيدە، مۇناي كەنىشتەرى جانىندا فوتوسەسسيا وتپەك.

بريفينگ بارىسىندا ماڭعىستاۋ وبلىستىق مەملەكەتتىك قىزمەت ىستەرى دەپارتامەنتى باسشىسىنىڭ مىندەتىن اتقارۋشى ەرلەگەن مەڭداليەۆ ءوزى قىزمەت اتقاراتىن اۋماقتىق دەپارتامەنتتە وبلىس، اۋدان اكىمدىكتەرىمەن بىرلەسىپ، جوبانىڭ وڭىرلىك دەڭگەيدەگى ءىس-شارالارىنا اتسالىسىپ جاتقانىن جەتكىزدى.

رەداكتور جانات قاپالبايەۆا