جەزقازعاندا جالعىز مال اۋرۋلارىن انىقتايتىن زەرتحانا جابىلىپ، ورنىنا ءدامحانا اشىلعان

جەزقازعان. قازاقپارات - «وڭىردە مال اۋرۋلارىن انىقتايتىن مەكەمەنىڭ جوقتىعى - وبلىستاعى ءىرى قارانىڭ قىرىلۋى بىردەن ءبىر سەبەپ» دەيدى جەرگىلىكتى قوعام بەلسەندىلەرى.

ول ازداي عيماراتتا قوعامدىق تاماقتانۋ ورنىنىڭ اشىلۋى ەلگە قاۋىپ توندىرەتىنىنە يەلەرى ءمان بەرمەي وتىر، دەپ حابارلايدى قازاقپارات ءتىلشىسى.

ۇلىتاۋ وبلىسىندا ءمۇيىزدى ءىرى قارانىڭ قىرىلۋىنا جەزقازعان وڭىرىندە ۆەتەرينارلىق زەرتحانانىڭ جوقتىعى مەن مال دارىگەرلەرىنىڭ تاپشىلىعى بىردەن ءبىر سەبەپ، دەيدى جەرگىلىكتى حالىق. سالدارىنان اۋىرعان مالعا دەر كەزىندە دياگنوز قويىلماي، ۋاقىتىلى ەم- دوم تاعايىندالمايدى. جىل باسىندا جەزقازعانداعى جالعىز اۋدانارالىق ۆەتەرينارلىق زەرتحانا جابىلعان.

«وسى لابوراتوريا مىنە، بۇكىل قۇجاتتارى پريبورلاردىڭ ءبارى ورنىندا تۇر. جەرى، توبەسى، جەلدەتكىشى ءبارى تاماشا. ۇكىمەتتىڭ ۋاقىتىندا مەملەكەتتىك ستاندارتپەن سالعان عيماراتى. بۇل مەكەمە 2022 -جىلدىڭ قاڭتارىنا دەيىن جۇمىس ىستەپ تۇردى. ءۇش قالاعا، اۋدانعا قىزمەت كورسەتتى. وسى شەنەۋنىكتەردىڭ ارقاسىندا ءبىر سىبايلاس جەمقورلىقتىڭ ارقاسىندا جەرگىلىكتى سەس بار، بارلىعى شيكىلىك جاساپ، ءدامحانا اشادى. 2014 -جىلى ساتىپ الادى 2 ميلليون تەڭگەگە، 2016 -جىلى زولىگين دەگەن سەس باستىعى كافە اشۋعا رۇقسات بەردى»، - دەيدى «ۇلىتاۋ» اۋىلشارۋاشىلىعىن قولداۋ جانە دامىتۋ قاۋىمداستىعىنىڭ ءتوراعاسى ابزالبەك مولاقوۆ.

اۋدانارالىق زەرتحانا عيماراتى قاڭىراپ تۇر دەپ ايتۋعا كەلمەيدى. قاجەتتى قۇرال- جابدىقتارمەن قامتىلعان. زەرتحانا وسىدان 8 اي بۇرىن جابىلعان. مەكەمەدە جۇمىس ىستەگەن 20-دان استام ادامنىڭ جارتىسىنان كوبى قازىر جۇمىسسىز وتىر. ال، جەزقازعان ايماعى ۆەتەرينارلىق زەرتحاناسىز قالدى.

«لابوراتوريانىڭ ءوز ستاتۋسى بار. 2-4 پاتوگەننىي رەاكتيۆپەن، جانۋارلارمەن جۇمىس ىستەيدى. بۇنىڭ ماڭايىندا ەشقانداي عيماراتتار سالماق تۇگىل، ادامدار جۇرۋگە بولمايدى. تىيىم سالىنادى. ال، ءبىزدىڭ سەس، شەنەۋنىكتەر وسى عيماراتتىڭ ىشىندە كافە اشىپ قويعان. بۇعان نە ايتاسىزدار؟»، - دەپ ناليدى ابزالبەك مولاقوۆ.

بۇل ماسەلەدە شيكىلىك كوپ. انىقتالعانداي، 2014 -جىلى تۇسىنىكسىز جولمەن ۆەتەرينارلىق زەرتحانا ورنالاسقان عيماراتتىڭ ءبىر بولىگى اۋكسيوندا ساتىلىپ كەتەدى. جالپى اۋماعى 900 شارشى مەترگە جۋىق جارتى عيمارات پەن كولىك قوياتىن گاراجدار نەبارى 2 ميلليون تەڭگەگە باعالانعان. اراعا 2 جىل سالىپ، عيماراتتى ساتىپ العان كاسىپكەر جەزقازعان قالالىق تۇتىنۋشىلار قۇقىعىن قورعاۋ بويىنشا قاۋىمداستىقتىڭ رۇقساتىمەن تۇنگى كلۋب اشادى. مۇنىڭ ءوزى - ورەسكەل زاڭبۇزۋشىلىق. سەبەبى سانيتارلىق تالاپتارعا ساي، قاۋىپتى ىندەتتەرمەن جۇمىس ىستەيتىن زەرتحانا ماڭايىندا قوعامدىق تاماقتانۋ ورنى بولماۋى شارت. فەرمەر ابزالبەك مولاقوۆ باستاعان ءبىر توپ بەلسەندىنىڭ جاعا ۇستاتار ماسەلەگە شاعىمدانىپ، بارماعان جەرى قالماپتى. ۇكىمەتكە دەيىن جەتكىزگەن. الايدا، ادىلدىك ىزدەگەن ازاماتتار ادىلەتسىزدىككە تاپ بولادى.

«دامحانامەن كورشى وتىرسىڭدار» دەپ، سانيتارلىق ەپيدەميولوگيالىق قىزمەت بىرنەشە مارتە ايىپپۇل سالعان.

سالدارىنان رەسپۋبليكالىق ۆەتەرينارلىق زەرتحانا وتكەن جىلى جەزقازعانداعى بولىمشەسىن جابۋ تۋرالى شەشىم شىعارادى. «ءسىزدىڭ عيماراتتا كافە بار دەيدى. ول كافەنى الدىمەن وزدەرى اشۋعا رۇقسات بەرەدى. سوسىن ولاي بولماۋى كەرەك دەپ ۇسىنىم بەرەدى. بەرگەن ءوزى سانەپيدستانسا عوي، سولاي ەمەس پە؟ بۇل ۆەتلابوراتورياعا 30-40 جىل بولعان. ءبىر كوممەرسانت كەپ كافە اشادى، سول ءۇشىن لابوراتوريا جابىلادى»، - دەيدى فەرمەر.

ۇلىتاۋ وبلىسىنىڭ جاڭادان تاعايىندالعان باسقارما باسشىلارى ماسەلەمەن جاقسى تانىس. الايدا، قولدان كەلەر شارا جوق دەيدى.

«ول ماسەلەنى ءبىز شەشپەيمىز. ءبىزدىڭ بالانستا ەمەس. ول كەزدە اگروونەركاسىپ كەشەنى دەگەن مەكەمە بولاتىن. ءالى دە بار. سوعان قاراستى عيمارات. سول كىسىلەر ساتىپ جىبەردى. ونى قالاي ساتقانى، نەگە ساتقانىنان حابارىمىز جوق»، - دەيدى ق ر ا ش م ۆەتەريناريالىق باقىلاۋ جانە قاداعالاۋ كوميتەتىنىڭ اۋماقتىق ينسپەكتسياسىنىڭ وبلىس بويىنشا اۋماقتىق ينسپەكتسياسى باسشىسىنىڭ م. ا. تولەگەن رىسبەكوۆ.

بۇل ماسەلەنى جەزقازعان حالقى بىرنەشە جىلدان بەرى كوتەرىپ كەلەدى. ونىڭ ءادىل شەشىمىن تالاپ ەتۋدە.

«بىلەسىزدەر، كەزىندە زاڭسىز ساتىپ جىبەرگەن ۆەتەرينارلىق لابوراتوريانىڭ ءبىر بولىگىن. ەندى ول جوعارى باعالاپ، كەرەمەت قۇنىن سۇراپ وتىر. 170 ميلليون دەيدى. ءبىز سول زەرتحانانى الامىز دەپ ويلاعامىز. زاڭ بويىنشا ءبىر عيماراتتا مال اۋرۋلارى جينالعان جەردە باسقا مەكەمە بولماۋ كەرەك. ال، ول جەردە ءدامحانا مەن كاراوكە اشىپ قويعان. ول جەردە بۇكىل مالدىڭ اۋرۋلارى قابىرعانىڭ ار جاعىندا. بۇل ماسەلەنىڭ شەشۋ جولدارىن ىزدەۋگە تاپسىرما بەردىم قالا اكىمىنە، وبلىس اكىمدىگىنە. 170 ميلليونعا ءبىز ونى ساتىپ الا المايمىز. بۇل اقشاعا ءبىز باسقا جەردەن عيمارات سوعىپ الامىز. دەگەنمەن شەشۋ جولدارىن قاراستىرىپ جاتىرمىز»، - دەپ ءتۇسىندىردى ۇلىتاۋ وبلىسىنىڭ اكىمى بەرىك ءابدىعالي ۇلى.

اۆتور اگاتا مۋحامەدجانوۆا