الماتىدا ادام ساۋداسىنىڭ جەتى دەرەگى انىقتالدى

الماتى. قازاقپارات - الماتىدا جىل باسىنان بەرى ادام ساۋداسىنىڭ جەتى دەرەگى انىقتالدى، دەپ حابارلايدى قازاقپارات ءتىلشىسى.

الماتى قالاسى كريمينالدىق پوليتسيا باسقارماسى باستىعىنىڭ ورىنباسارى رۋسلان سماعۇلوۆتىڭ حابارلاۋىنشا، الماتىدا جىل باسىنان بەرى ادام ساۋداسىنا قاتىستى جەتى قىلمىستىق قۇقىق بۇزۋشىلىق انىقتالدى.

«اتاپ ايتقاندا، جەزوكشەلىكپەن اينالىسۋعا ارنالعان ءۇيدى ۇيىمداستىرۋ جانە ۇستاۋ بويىنشا بەس دەرەك، كامەلەتكە تولماعان ادامدى جەزوكشەلىكپەن اينالىسۋعا تارتۋدىڭ ءبىر دەرەگى جانە جاڭا تۋعان ءسابيدى ساتۋعا وقتالۋدىڭ ءبىر دەرەگى اشكەرەلەندى. قازىرگى ۋاقىتتا اتالعان ەپيزودتار بويىنشا سوتقا دەيىنگى تەرگەۋ جۇرۋدە. كىنالىلەر جاساعان ارەكەتتەرى ءۇشىن زاڭ اياسىندا قاتاڭ جاۋاپ بەرەتىن بولادى»، - دەدى رۋسلان سماعۇلوۆ.

ول سونداي-اق كەز كەلگەن جان ادام ساۋداسىنىڭ قۇربانىنا اينالۋى مۇمكىن ەكەنىن اتاپ ءوتتى.

«تاجىريبە كامەلەتكە تولماعان جاسوسپىرىمدەر مەن سابيلەردىڭ دە قورعالماعانىن كورسەتەدى. وسى ورايدا ادام ساۋداسىمەن كۇرەستە قوعامدىق جانە ۇكىمەتتىك ەمەس ۇيىمداردىڭ ءرولى دە ماڭىزدى»، - دەدى ول.

فوتو: polisia.kz