الماتى اۋەجايى اۋماعىندا توبەلەس شىعارعاندار قاماۋعا الىندى

الماتى. قازاقپارات - الماتى حالىقارالىق اۋەجايىنىڭ اۋماعىندا توبەلەس شىعارعان بۇزاقىلاردى قاماۋعا الۋ سانكتسيالاندى، دەپ حابارلايدى قازاقپارات ءتىلشىسى.

«26- شىلدەگە قاراعان ءتۇنى اۋە ايلاعىنىڭ اۆتوتۇراعىندا ءۇش ماس ەر ادام توبەلەسكەن بولاتىن. بۇل تۋرالى پوليتسياعا كوشەدە ءوتىپ بارا جاتقاندار حابارلادى. توبەلەسىپ جاتقاندار پوليتسيا قىزمەتكەرلەرىنىڭ تالاپتارىنا اگرەسسيامەن جاۋاپ بەردى. ولاردىڭ ءبىرى - بۇرىن سوتتالعان 28 جاستاعى ۋ. ەسىمدى ازامات سىرانىڭ شىنى بوتەلكەسىن سىندىرىپ، پوليتسەيگە قاراي جۇگىردى، ونى سوققىعا جىققىسى كەلدى. اۋىر قىلمىستى توقتاتقان ءتارتىپ ساقشىسى قىزمەتتىك قارۋىنان اسپانعا ەسكەرتۋ وعىن اتقان بولاتىن»، - دەدى الماتى قالالىق پوليتسيا دەپارتامەنتى باستىعىنىڭ ورىنباسارى رۇستەم ءابدىراحمانوۆ.

پوليتسيا وكىلىنىڭ ايتۋىنشا، توبەلەسكە قاتىسۋشىلار ۇستالدى.

ولار - الماتى جانە تۇركىستان وبلىستارىنىڭ تۇرعىندارى. ەكەۋى - بۇرىن ادام توناعانى جانە بوتەننىڭ مۇلكىن ۇرلاعانى ءۇشىن سوتتى بولعان.

«قۇقىق بۇزۋشىلار ارەكەتى ق ر ق ك- ءنىڭ 293-بابى 2-بولىگى «بۇزاقىلىقپەن» سارالاندى. سوتقا دەيىنگى تەرگەۋ ورگانى سوتتان كۇدىكتىلەرگە قاتىستى قاماۋعا الۋ بۇلتارتپاۋ شاراسىن تاڭداۋدى سۇرادى. ونى تۇركسىب اۋدانىنىڭ پروكۋرورى دا قولدادى. تەرگەۋ سوتى قىلمىستىڭ ءۇش قاتىسۋشىسىن قاماۋعا الۋعا سانكتسيا بەردى»، - دەيدى رۇستەم ءابدىراحمانوۆ.

بۇعان دەيىن الماتى اۋەجايىندا توبەلەس بولىپ، ءتارتىپ ساقشىسى قىزمەتتىك قارۋدان وق اتقانى تۋرالى جازعان ەدىك.