پرەزيدەنت دجو بايدەننىڭ نەمەرەسىنىڭ ۇيلەنۋ تويى اق ۇيدە وتەدى

ۆاشينگتون. قازاقپارات – ا ق ش پرەزيدەنتى دجو بايدەننىڭ ۇلكەن نەمەرەسى ناومي بايدەن كۇزدە تۇرمىسقا شىعۋىنا بايلانىستى تويىن اق ءۇيدىڭ وڭتۇستىك بولىگىندەگى كوگالدا وتكىزەدى.

بۇل - اق ۇيدەگى 2013 -جىلدان بەرگى العاشقى نەكە قيۋ ءراسىمى بولماق، دەپ حابارلايدى قازاقپارات ABC News اگەنتتىگىنە سىلتەمە جاساپ.

28 جاستاعى ناومي بايدەن بەيسەنبى كۇنى Twitter اككاۋنتىندا بىلاي دەپ جازدى:

«نەكە قيۋ ءراسىمى قايدا وتەتىنىن بەلگىلەدىك... ءبىز وڭتۇستىك كوگالدا ۇيلەنەمىز. وتە قاتتى قوبالجىپ تۇرمىن».

بۇعان دەيىن پرەزيدەنت بايدەننىڭ نەمەرەسى مەن ونىڭ 25 جاستاعى بولاشاق كۇيەۋى پيتەر نيل 19- قاراشادا اق ۇيدە ۇيلەنەدى دەپ جاريالانعان ەدى. ەكەۋى دە - ادۆوكاتتار.

پرەزيدەنت اكىمشىلىگىنىڭ وكىلدەرى مالىمدەگەندەي، بايدەندەر وتباسى توي شىعىنىن وزدەرى جابادى. اق ۇيدە بۇعان دەيىن 18 ۇيلەنۋ تويى مەن ءتورت قابىلداۋ راسىمدەلگەن. سوڭعى رەت مۇندا 2013 -جىلى پرەزيدەنت باراك وبامانىڭ فوتوگرافى پيت سوۋز شاڭىراق كوتەرگەن بولاتىن. سوڭعى قابىلداۋ 2008 -جىلى پرەزيدەنت دجوردج بۋشتىڭ قىزى دجەننا بۋشتىڭ تويى الدىندا ءوتتى. تويلار قىزعىلت باقتا بولعان ەدى، اق ءۇيدىڭ وڭتۇستىك كوگالىندا ەشقانداي نەكە قيۋ ءراسىمى وتپەگەن.

فوتو: abcnews.go.com

اۆتور اقبوپە ءابدراسۋل