فرانسيادا ءورت ءسوندىرۋشى ورمانعا وت قويعان

نۇر- سۇلتان. قازاقپارات - چەحيا مەن گەرمانيا شەكاراسىنداعى الاپات ورمان ءورتى «چەح شۆەيسارياسى» ۇلتتىق پاركىنە ەداۋىر شىعىن كەلتىرگەن.

جاقىن اۋىلداردان 500 ادام ەۆاكۋاتسيالاندى، دەپ حابارلايدى قازاقپارات Euronews اگەنتتىگىنە سىلتەمە جاساپ.

ءورت وتكەن دەمالىستا باستالعان. جالىندى اۋىزدىقتاعانداي بولىپ ەدى، الايدا بەيسەنبى كۇنى قايتا ءورشىدى. شەكارالاس ەكى ەلدىڭ جۇزدەگەن ءورت سوندىرۋشىلەرى ءتىلسىز جاۋمەن كۇرەسىپ جاتىر، ولارعا كورشىلەس پولشا مەن سلوۆاكيادان ارىپتەستەرى كومەككە كەلگەن. يتاليادان دا ەكى ءورت ءسوندىرۋ ۇشاعى كەلىپ جەتكەن.

فرانسياداعى ب ا ق- تىڭ حابارلاۋىنشا، ءورت ءسوندىرۋشى ۆولونتەرلەردىڭ ءبىرى ەرو اۋدانىندا قاساقانا ءورت شىعارعانىن مويىنداعان. ول وتباسىنداعى كۇيبەڭ تىرشىلىكتەن شارشاپ، ءورت ءسوندىرىپ ادرەنالين العىسى كەلگەنىن ايتقان. قازىر ءورت ءسوندىرۋشى ۇستالعان. فرانسيانىڭ وڭتۇستىك- شىعىسىنداعى اردەشتە ءورت سوندىرۋشىلەر جالىنمەن كۇرەستى جالعاستىرىپ جاتىر. «بۇنداي اۋقىمدى ءورتتى ءبىز كوپ جىلدان بەرى كورمەگەن ەدىك»، - دەدى ورتتەن ەڭ كوپ زارداپ شەككەن لۋسساسا قالاسىنىڭ مەرى.

«1200 گەكتار ورماندى جويىپ جىبەرگەن جالىنمەن كۇرەسىپ جاتىرمىز، بۇگىن تاڭەرتەڭ ونى اۋىزدىقتادىق»، - دەدى SDIS Ardèche اپاتتىق وپەراتسيالارى باسقارۋشى جان- فيليپپ لادە.

فوتو: ru.euronews.com

اۆتور اقبوپە ءابدراسۋل