سولتۇستىكتە ەت وڭدەۋ كاسىپورىندارىنىڭ جارتىسى جابىلدى

نۇر- سۇلتان. قازاقپارات- سولتۇستىك قازاقستان وبلىسىندا ەت وڭدەۋ كاسىپورىندارىنىڭ جارتىسى بانكروتقا ۇشىراپ، جابىلىپ قالدى. سەبەبى قازىر وڭىردەگى بولشەك ساۋدادا كورشى رەسەي ەلىنەن اكەلىنگەن ارزان ءونىم قاپتاپ كەتكەن.

سالدارىنان وتاندىق تاۋارعا سۇرانىس تومەندەدى. سولتۇستىك قازاقستان وبلىسىندا ەت وڭدەۋ سالاسى تۇرالاپ قالۋى مۇمكىن. بۇگىننىڭ وزىندە وڭىردەگى كاسىپورىندار جاپپاي جۇمىسىن توقتاتۋدا. ال ءىرى ساۋدا ورىندارىندا قازىر ساپالى ەمەس، كوبىنە كورشى رەسەي ەلىنەن اكەلىنگەن ارزان ونىمدەر ساتىلىپ جاتىر.

سەرىك يلياسوۆ، ەت وڭدەۋ كەشەنىنىڭ ديرەكتورى:

- جاسىراتىنى جوق، قازىرگى تاڭدا بولشەك ساۋدا جەلىلەرى اقشانى بىزدەن كوپ تابادى. جەڭىلدىك سۇرايدى. تاۋارىمىزدىڭ باعاسىن تۇسىرمەسەك، ولار سورەلەرگە شىعارىلمايدى. قازىر كاسىپورىندا 150-دەن استام ەت ءونىمى دايىندالادى. ال ونىڭ تەك 3-4 ءتۇرى عانا سۋپەرماركەتتەردە ساۋدالانۋدا. ال قالعاندارىن ءبىز ءوزىمىزدىڭ دۇكەندەرىمىزدە ساتۋعا ءماجبۇرمىز.

راسىندا قازىر نارىق يمپورتتىق تاۋارعا تولدى. وتاندىق ءونىمنىڭ باعاسىن ارزانداتۋ دا مۇمكىن بولماي تۇر. سەبەبى ەت ونىمدەرىنە قاجەتتى قاپتامالار كورشى رەسەيدە جاسالادى. ال رۋبلدىڭ تۇراقسىزدىعى، كاسىپكەرلەردىڭ قالتاسىن قاعىپ وتىرعانى انىق.

سۆەتلانا مەدەننيكوۆا، كاسىپكەر:

- قازىر سۋپەرماركەتتەرمەن ارىپتەستىك جوق. ولار كەرىسىنشى رەسەي كاسىپكەرلەرىمەن قويان- قولتىق جۇمىس ىستەپ جاتىر. سالدارىنان ارزان ونىمدەر كوبەيدى. ال ءبىز بولساق، ءوز ونىمدەرىمىزدى رەسەيگە دە شىعارا الماي جاتىرمىز.

بۇگىنگى كۇنى وڭىردەگى 15 كاسىپورننىڭ تەك جارتىسى عانا جۇمىسىن جالعاستىرىپ جاتىر. ونىڭ وزىندە ولار ءوندىرىس كولەمىن ازايتقان.

مارات ىسقاقوۆ، وبلىستىق كاسىپكەرلەر پالاتاسى ديرەكتورىنىڭ ورىنباسارى:

- راسىندا بۇل ماسەلە كاسىپكەرلەردى الاڭداتىپ وتىر. ءبىز نارىقتى زەرتتەپ، زەردەلەدىك. ەندى بۇل سۇراقپەن ورتالىق اپپاراتقا شىعۋدى جوسپارلاپ وتىرمىز. ول ءۇشىن ءتيىستى قۇجاتتاردىڭ بارلىعىن جينادىق.

بۇل سۇراقتى رەسپۋبليكالىق دەڭگەيدە قاراستىرۋ قاجەت. وسىلايشا كاسىپكەرلەر مەملەكەت تاراپىنان بارىنشا قولداۋ بولسا دەيدى. ويتكەنى جاعداي رەتتەلمەسە، ازىق- تۇلىك قاۋىپسىزدىگىن قالىپتاستىرۋ قيىنعا سوعۋى ىقتيمال.

www.24.kz