ەۋروپا ۇنەمدەۋگە كوشتى

نۇر- سۇلتان. قازاقپارات - الەمدىك ەكونوميكانىڭ بيىلعى جانە كەلەسى جىلعى ءوسىمى تومەندەدى. جايسىز حاباردى حالىقارالىق ۆاليۋتا قورى جەتكىزدى. ال ا ق ش- تىڭ فەدەرالدى قور جۇيەسى بازالىق پايىزدىق مولشەرلەمەنى كوتەردى.

ساراپشىلار «ەندى بۇل جىلجىمايتىن مۇلىك نارىعىنا كەرى اسەر ەتەدى» دەيدى. ەنەرگەتيكا داعدارىسىنا تاپ بولعان ەۋروپالىقتار قازىردەن قاتاڭ ۇنەمدەۋ شارالارىنا كوشتى.

اۆستراليانىڭ دا جاعدايى ءماز ەمەس. حالىقارالىق ۆاليۋتا قورى الەمدىك ەكونوميكانىڭ بيىلعى ءوسىمىن 3,2 پايىزعا تومەندەتتى. ال كەلەسى جىلعى بولجام 2,9 پايىزعا كەمىدى. ساراپشىلار كەرى كەتۋگە پاندەميانىڭ تەرىس سالدارى مەن رەسەيدىڭ ۋكرايناعا باسىپ كىرۋى تىكەلەي اسەر ەتكەنىن العا تارتادى. سونىمەن قاتار حالىقارالىق ۆاليۋتا قورى عالامدىق ينفلياتسيا بيىل دامىعان مەملەكەتتەردە 6,6, ال دامۋشى ەلدەردە 9 جارىم پروتسەنتكە وسەدى دەپ ەسكەرتتى. الەمدىك ءوسىم 1970 -جىلدان بەرى 5 رەت تومەندەگەن.

پەر وليۆە گۋرينشاس، ح ۆ ق باس ەكونوميسى:

- ءبىرىنشى سەبەپ، ەڭ جوعارى ينفلياتسيا ا ق ش پەن ەۋروپانىڭ ەكونوميكاسى ءىرى ەلدەردە بولادى دەپ كۇتىلۋدە. بۇل اقشا- نەسيە ساياساتىنا ۇلكەن سالقىنىن تيگىزبەك. ەكىنشىدەن، قىتايدا كۇتپەگەن جەردەن كوۆيد قايتا ءورشىپ، كارانتين كۇشەيدى. ۇشىنشىدەن، ۋكرايناداعى سوعىس پەن سانكسيالاردىڭ تەكەتىرەسى الەمدىك ەكونوميعا كەرى اسەر ەتتى.

ا ق ش- تا ينفلياتسيا ىرىق بەرمەي تۇر

ا ق ش- تىڭ فەدەرالدى قور جۇيەسى بازالىق مولشەرلەمەنى 75 باعامعا كوتەردى. دەگەنمەن، بۇدان ينفلياتسيا دەڭگەيى ايتارلىقتاي تومەندەگەن جوق. قايتا جۇمىسسىزدىق ارتىپ، ەكونوميكا كەرى كەتۋدە. امەريكادا مۇنداي شەشىم سوڭعى رەت 1994 -جىلى قابىلدانعان. ايتا كەتەيىك، ا ق ش- تا قىمباتشىلىق كورسەتكىشى ناۋرىزدان بەرى 8 پروتسەنتكە ارتتى. ماماندار ينفلياتسيانى اۋىزدىقتاۋ ءۇشىن ءالى كوپ كۇش- جىگەر قاجەت دەيدى.

بوب م. ماكناب، ەكونوميست:

- ءۇي شارۋاشىلىعى تاۋارلارىن تۇتىنۋ دەڭگەيىنىڭ تومەندەگەنىن بايقاپ وتىرمىز. امەريكاندىقتار الداعى ۋاقىتتا اقشانى كوبىرەك ۇنەمدەۋگە كىرىسەدى. فەدەرالدى قور قازىر قيىن جاعدايعا قالدى. ول ينفلياتسيانى باقىلاۋدا ۇستاۋعا ءتيىس. تۇتىنۋشىلىق سۇرانىستى تومەندەتۋ ءۇشىن اقشانىڭ قۇنىن كوتەرۋى كەرەك. ال بۇل ەكونوميكالىق ءوسىمدى تەجەيدى.

اۆستراليادا قىمباتشىلىق قىسىپ تۇر

اۆستراليادا ينفلياتسيا 1 جىل ىشىندە 6 پروتسەنتكە ارتتى. قىمباتشىلىق اسىرەسە بيىل قاتتى سەزىلىپ وتىر. جاسىل قۇرلىقتاعى جانارماي باعاسى 30، ال تۇرعىن ءۇي قۇنى 25 پايىزعا كوتەرىلدى. قازىر بۇل ەلدە جۇمىس كۇشى مەن قۇرىلىس ماتەريالدارى تاپشى. سۋ تاسقىنى دا كوبەيدى. شىعىستاعى باۋ- باقشالار دۇرىس ءونىم بەرمەي، جەمىس- جيدەك پەن كوكونىس باعاسى اسپانداپ كەتتى.

دجيم چالمەرس، اۆستراليانىڭ قازىناشىلىق باسشىسى:

- قازىر ءبىزدىڭ ەڭ ءىرى ساۋدا سەرىكتەسىمىز قىتاي. سوندىقتان وسى ەلدىڭ ەكونوميكاسىنداعى بولىپ جاتقان داعدارىس ءبىزدىڭ ەلدىڭ الەۋەتىنە تىكەلەي اسەر ەتەدى. ۋكرايناداعى جاعدايدىڭ دا ىقپالى وراسان.

ەۋروپانى قىمباتشىلىق جايلادى

ەۋروپانى دا قىمباتشىلىق جايلادى. فرانسيا بيلىگى تۇرعىندار ءۇشىن جانارماي الۋعا كومەك قارجى بەرۋدى جوسپارلاپ وتىر. مەملەكەت قىركۇيەك پەن قازاندا ءار ليتر ءۇشىن 30 سەنت تولەمەك. يتاليا ۇكىمەتى قوعامدىق ورىندارداعى اۋاباپتاعىشتار مەن جىلۋ جۇيەسىن ءوشىرۋدى مىندەتتەدى. گەرمانيا دا قاتاڭ ۇنەمدەۋ شارالارىنا كىرىستى. اۋگسبۋرگ قالاسىندا تۇندە كوشەدەگى شامداردىڭ جارىعىن باسەڭدەتىپ، فونتانداردى توقتاتقان.