الماتىدا ارمەنيادا تىركەلگەن ءنومىرى بىردەي ەكى كولىك انىقتالدى
مەگاپوليس جولدارىندا پوليتسەيلەردىڭ نازارىنا «Nissan» جانە «Toyota» Alphard» كولىكتەرى ىلىككەن.
«ەڭ قىزىعى - ەكى كولىكتە دە ءبىر ءنومىر جانە بىردەي كولىكتى تىركەۋ كۋالىگى بار. كولىكتەر ارمەنيا رەسپۋبليكاسىندا تىركەلگەن. ولاردى جەرلەستەرىمىز باسقارادى. بەلگىلى بولعانداي، شاعىن اۆتوبۋس جۇرگىزۋشىسى قىزىلوردا وبلىسى جاڭاقورعان اۋدانىنا جولاۋشى تاسىمالداۋمەن اينالىسادى. ول كولىكتى بىرنەشە اي بۇرىن باتىس قازاقستاندا ساتىپ العانىن ايتادى. بۇل دەرەك بويىنشا تەكسەرۋ جۇمىستارى باستالدى»، - دەدى الماتى قالالىق پوليتسيا دەپارتامەنتى اكىمشىلىك پوليتسيا باسقارماسى باستىعىنىڭ ورىنباسارى بولاتبەك باياتانوۆ.
پوليتسيا وكىلىنىڭ ايتۋىنشا، سوتقا دەيىنگى تەرگەۋ اياقتالعان سوڭ اتالعان كولىك جۇرگىزۋشىلەرىنىڭ قايسىسى جالعان ءنومىردى پايدالانعانى بەلگىلى بولادى.
«تەرگەۋ جانە ساراپتاما ناتيجەسى شىققاننان كەيىن ق ر زاڭناماسىنا سايكەس شارالار قابىلداناتىن بولادى»، - دەدى بولاتبەك باياتانوۆ.
