كىشى تالدىكول ماڭىنداعى قۇرىلىسقا قاتىستى ساۋلەتشىلەر نە دەيدى
«كىشى تالدىكول - استانانىڭ كورىكتى جەرلەرىنىڭ ءبىرى. ەلوردانىڭ ساۋلەت جوسپارىن جاساعان كيسە كۋروكاۆانىڭ جۇمىسىن تالقىلاعان كەزدە بۇل تەرريتوريانى ساقتاپ قالۋ كەرەك دەگەن ۇيعارىم شىعارعانبىز. قالانىڭ جاسىل ايماعى رەتىندە تۇرۋى ءتيىس ەدى. سونىمەن قوسا، ول قالا دەڭگەيىنەن تومەن ورنالاسقان. تالدىكول ماڭىنا قۇرىلىس جۇرگىزۋدىڭ كەرەگى جوق ەدى. قازىر وندا قۇرىلىس ءجۇرىپ جاتقان بولسا، وندا شەشىمدى تاعى دا ساراپتاپ، قالعان جەرلەرىن ساقتاپ قالعان ءجون»، - دەدى ق ر قالا قۇرىلىسشىلارى وداعىنىڭ پرەزيدەنتى ليۋبوۆ نىسانبايەۆا.
ال، قازاقستاننىڭ قۇرمەتتى ساۋلەتشىسى سارسەنبەك ءجۇنىسوۆ كىشى تالدىكولدەگى ماسەلەنىڭ تۋىنداۋى - ساۋلەتشىنىڭ السىزدىگىنەن بولىپ وتىرعانىن جەتكىزدى.
«قالانىڭ باس جوسپارى ازىرلەنگەندە قۋانىپ ەدىك. وندا استانانىڭ 50 پايىزى جاسىل جەلەك، قالعان 50 پايىزى قۇرىلىس اۋماعى بولادى دەپ كورسەتىلگەن. قازىر جىل سايىن جاسىل اۋماق بولۋى كەرەك جەرلەر قىسقارىپ جاتىر. ءبىز كيسە كۋروكاۆا ۇسىنىسىمەن بەكىتىلگەن جوسپاردى ۇمىتىپ كەتتىك. بۇگىندە كەرىسىنشە قۇرىلىس قارقىن الدى. ەلوردا - جاسىل قالا بولادى دەگەننىڭ بارلىعى ەستەن شىعىپ كەتتى. بۇل ءالسىز ساۋلەتشى مەن مىقتى قۇرىلىس كومپانيالارىنىڭ سالدارىنان بولىپ وتىر. ساۋلەتشى بىلىكتى بولسا، ول بارلىعىنا قارسى شىعىپ، بۇل جەردى الىپ قالار ەدى»، - دەپ ماسەلەنىڭ سەبەبىن ءتۇسىندىردى سارسەنبەك ءجۇنىسوۆ.
