الماتىنىڭ تاۋ بوكتەرىندە سالىنىپ جاتقان ەليتالى ءۇيدىڭ ءبىر قاباتى بۇزىلادى

الماتى. قازاقپارات - الماتىنىڭ تاۋ بوكتەرىندە سالىنىپ جاتقان ەليتالى تۇرعىن ءۇي كەشەنىنىڭ ءبىر قاباتى بۇزىلادى.

بۇل تۋرالى قالا اكىمدىگىنەن ءمالىم ەتتى، دەپ حابارلايدى قازاقپارات.

«سالىنىپ جاتقان Pine Hill تۇرعىن ءۇي كەشەنىنىڭ ءۇشىنشى قاباتى سوت شەشىمىمەن بۇزىلادى. ەرمەنساي شاعىناۋدانىندا 7-تۇيىق كوشە، 8/1 ۋچاسكەسىندە سالىنىپ جاتقان نىساندى تەكسەرۋ كەزىندە قۇرىلىس سالۋشى تۇرعىن ءۇيدىڭ ءۇشىنشى قاباتىن زاڭسىز سالىپ جاتقانى انىقتالدى. رۇقسات قۇجاتى تەك 2 قاباتقا بەرىلگەن»، - دەلىنگەن ۇسىنىلعان حابارلامادا.

ءمالىم ەتىلگەندەي، وتكەن جىلدىڭ قاراشا ايىندا الماتى اكىمدىگىنىڭ باسقارماسى ءۇشىنشى قاباتتى بۇزۋ تۋرالى سوتقا ارىز تۇسىرگەن.

الايدا، سوت ارىزدى قاناعاتتاندىرۋدان باس تارتقان. باسقارما اپەللياتسيالىق شاعىم بەرگەن.

«اپەللياتسيالىق شاعىم قاناعاتتاندىرىلدى. ءۇشىنشى قاباتتى بۇزۋ تۋرالى سوت شەشىمى زاڭدى كۇشىنە ەندى جانە ادىلەت دەپارتامەنتىنىڭ ورىنداۋىنا بەرىلدى»، - دەلىنگەن اكىمدىك مالىمەتىندە.

ەسكە سالايىق، ەندى الماتىلىقتار سالىنىپ جاتقان تۇرعىن ۇي نىساندارىنىڭ زاڭدىلىعى تۋرالى قالا قۇرىلىسىن باقىلاۋ باسقارماسىنىڭ تەلەفون ءنومىرى ارقىلى بىلە الادى.

ال بيىلعى 1 - تامىزدان باستاپ مەگاپوليستە ساۋلەت-قۇرىلىس سالاسىنداعى ولقىلىقتاردى رەتتەپ وتىراتىن قالا قۇرىلىسى كەڭەسى قۇرىلادى. ول اكىمدىك جانىندا جۇمىس ىستەيدى.