جەتىسۋ وبلىسىندا فري كارتوبى وسىرىلەتىن بولادى

نۇر- سۇلتان. قازاقپارات - جەتىسۋ وبلىسىندا فري كارتوبىن وندىرەتىن جاڭا كاسىپورىن سالۋ مۇمكىندىگى قاراستىرىلىپ جاتىر.

بۇگىن ق ر اۋىل شارۋاشىلىعى ءمينيسترىنىڭ ورىنباسارى ءابىلحايىر تامابەكتىڭ وڭىرگە ساپارى بارىسىندا ينۆەستورلارمەن جانە اكىمدىكتەردىڭ وكىلدەرىمەن ارىپتەستىك ماسەلەلەرى تالقىلاندى، دەپ حابارلايدى قازاقپارات.

كارتوپ وسىرۋگە ماماندانعان ءىرى شارۋا قوجالىقتارىنىڭ وكىلدەرىمەن كەزدەسۋدەن كەيىن، ءا. تامابەك نيدەرلاند كومپانياسىنىڭ وكىلدەرىمەن بىرگە يندۋستريالىق ايماقتا ينفراقۇرىلىمى دايىن جانە جاڭا ازىق-تۇلىك ءوندىرىسى سالىنۋى مۇمكىن يندۋستريالىق ايماقتاعى ۋچاسكەنى قاراپ شىقتى.

ساپاردىڭ سوڭىندا ۆيتسە-مينيستر جەتىسۋ وبلىسىنىڭ اكىمى بەيبىت يسابايەۆپەن جانە «Farm Frites Kazakhstan» ج ش س باسشىسى يوزەف بوەرمەن كەزدەستى.

تاراپتار قازاقستاندا كارتوپ يندۋسترياسىن دامىتۋ جونىندەگى جوسپارلارىن تالقىلاپ، زاۋىتتىڭ بولاشاقتا ورنالاساتىن جەرىن تالقىلادى.

«جوبا جۇزەگە ءساتتى اسىرىلاتىن بولسا، وندىرۋشىلەر سانىنىڭ كوپ بولۋى قاجەت ەتىلەدى. وسىعان وراي 10000 گەكتار القاپتا كارتوپ ءوسىرۋ بويىنشا فەرمەرلىك شارۋاشىلىقتىڭ قوسىمشا جوباسىن ىسكە اسىرۋ جوسپارلانىپ وتىر. سونىمەن قاتار، ينۆەستيتسيالار تۋرالى كەلىسىم جاساسۋ مۇمكىندىگى قاراستىرىلىپ جاتىر. وندا بارلىق تاراپتىڭ الەۋمەتتىك-ەكونوميكالىق مىندەتتەمەلەرى رەتتەلەدى جانە «Farm Frites» كومپانياسىنىڭ بىرىكتىرىلگەن فري كارتوپ زاۋىتىن سالۋ كەزىندە مەملەكەتتىك قولداۋ شارالارى ناقتى بەلگىلەنەدى»، - دەلىنگەن مينيسترلىك حابارلاماسىندا.

ايتا كەتەيىك، «Farm Frites» (Farm Frites Beheer B. V.)» كومپانياسىنىڭ وكىلدەرى 5 جىلدان استام ۋاقىت بويى قازاقستاننىڭ ءبىرقاتار وڭىرىندە كارتوپ پەن كارتوپ تۇقىمىن تاجىريبە رەتىندە وتىرعىزىپ كەلەدى. ولار جوعارى ساپاداعى جانە زاۋىتتىڭ قاجەتتىلىكتەرى ءۇشىن قاجەتتى كولەمدەگى كارتوپتى جەتكىزۋدى، سونداي-اق جەرگىلىكتى فەرمەرلەردى وقىتۋدى كوزدەپ وتىر. 1971-جىلى نيدەرلاندتا وتباسىلىق كاسىپورىن رەتىندە قۇرىلعان «Farm Frites» كومپانياسىنىڭ نەگىزگى قىزمەتى - كارتوپتان مۇزداتىلعان جانە سالقىنداتىلعان ونىمدەر ءوندىرۋ. الەمنىڭ 40 ەلىندە 6 زاۋىتى مەن 40 ساتۋ كەڭسەسى بار، وندا بارلىعى 1500 قىزمەتكەر جۇمىس ىستەيدى. «Farm Frites» - الەم بويىنشا فري ءوندىرىسى بويىنشا ءتورتىنشى ورىندا تۇرعان جانە McDonalds، KFC جانە باسقا دا فاست-فۋد مەيرامحانالارىنىڭ نەگىزگى حالىقارالىق جەتكىزۋشىلەرىنىڭ ءبىرى.