قىتايدىڭ ۋحان قالاسىندا قايتادان قاتاڭ كارانتين جاريالاندى
بيلىك ۆيرۋس بەلگىلەرى جوق ءتورت ناۋقاس انىقتالعان سوڭ قالا ماڭىنداعى ءبىر ميلليونعا جۋىق تۇرعىننان ۇيدە وتىرۋدى تالاپ ەتتى، دەپ حابارلايدى قازاقپارات BBC اقپارات اگەنتتىگىنە سىلتەمە جاساپ.
جيانسيا اۋدانىنىڭ تۇرعىندارىنا الداعى ءۇش كۇن بويى ۇيدەن شىقپاۋ جونىندە بۇيرىق بەرىلدى. ەكى كۇن بۇرىن 12 ميلليون حالقى بار ۋحان قالاسىندا تۇرعىنداردى ادەتتەگى تەستىلەۋ كەزىندە ەكى اسيمپتوماتيكالىق جاعداي انىقتالعان. سودان كەيىن وسى ەكى ادامنىڭ بايلانىس تىزبەگى بويىنان اۋرۋ بەلگىلەرى جوق تاعى ەكى تاسىمالداۋشى انىقتالعان سوڭ، بيلىك دەرەۋ كارانتين تۋرالى قاۋلى شىعاردى.
قىتاي پاندەميا باستالعاننان بەرى جاپپاي تەستىلەۋ، وقشاۋلاۋ جانە اۋرۋ جۇقتىرعانداردى قاتاڭ وقشاۋلاۋدى قامتيتىن COVID- كە قارسى قاتاڭ شارالار ساياساتىن جۇرگىزىپ كەلەدى. ناتيجەسىندە، قىتايدىڭ رەسمي ستاتيستيكاسى ەلدە الەمنىڭ كوپتەگەن ەلدەرىنە قاراعاندا كوۆيدتەن «جان باسىنا شاققانداعى» ءولىم كورسەتكىشى از بولعانىن تىركەدى، الايدا قالالار مەن ايماقتاردىڭ ءجيى جابىلۋى ادامدار، بيزنەس جانە تۇتاستاي العاندا ەكونوميكاعا اۋىر ءتيدى.
قاتاڭ كارانتينگە جابىلعان العاشقى قالا ۋحان بولدى. وندا جاڭا كوروناۆيرۋس 2020 -جىلدىڭ باسىندا انىقتالدى. سول كەزدە الەم قىتاي بيلىگىنىڭ بۇل شاراسىن تۇسىنبەي، تاڭقالعان، ءبىراق كوپ ۇزاماي كوپتەگەن قالالار مەن ەلدەر ءدال وسىنداي شارالار قولدانۋعا ءماجبۇر بولدى.
