س ق و-دا كۇيبەڭ تىرلىكتەن شارشاعان ايەل ەشكىمگە ەسكەرتپەستەن دەمالىس ورنىنا كەتىپ قالعان
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، 15-شىلدە كۇنى پەتروپاۆلدىڭ 30 جاستاعى تۇرعىنىنا ىزدەۋ جاريالاندى. ايەل كەشكىلىك ۋاقىتتا «Lada» اۆتوكولىگىمەن بەلگىسىز باعىتتا كەتىپ قالعان. ونىڭ جۇرگەن جەرىن وزدىگىنەن انىقتاي الماعان تۋىستارى امالسىزدان پوليتسياعا حابارلاسىپ، كومەك سۇراعان. جوعالعان ايەلدى ىزدەۋگە ۆولونتەرلەر دە ات سالىستى. «اعىن» بەينەباقىلاۋ جۇيەسى ارقىلى كولىكتىڭ ءجۇرىپ وتكەن جولى بەلگىلى بولدى. ناتيجەسىندە ءىس-ءتۇزسىز جوعالعان ايەلدىڭ ايىرتاۋ اۋدانىنداعى دەمالىس ورنىندا بولعانى انىقتالدى. ول ءبىر ءسات كۇيبەڭ تىرلىكتەن دەمالماق بولىپتى.
«ايتا كەتەتىنى، دەمالىس ايماقتارىندا ءىس-ءتۇزسىز جوعالىپ كەتۋدىڭ الدىن الۋ بويىنشا شارالار قابىلدانعان. پوليتسەيلەر تۇراقتى تۇردە رەيدكە شىعادى، دەمالۋشىلارمەن ءتۇسىندىرۋ جۇمىسىن جۇرگىزەدى، تابيعاتتا قاۋىپسىز ءجۇرىپ-تۇرۋ ەرەجەلەرى تۋرالى ايتادى. جولعا شىعار الدىندا ساپار تۋرالى جاقىن ادامدارىڭىزدى مىندەتتى تۇردە حاباردار ەتىپ، تەلەفوننىڭ اقاۋى جوق ەكەندىگىنە كوز جەتكىزىڭىز. ءوڭىر تۇرعىندارىنان دەمالىسقا شىققاندا بارىنشا جاۋاپكەرشىلىك تانىتۋلارىن سۇرايمىز»، - دەيدى س ق و پوليتسيا دەپارتامەنتى كريمينالدىق پوليتسيا باسقارماسىنىڭ باستىعى مارات جۇماليەۆ. جاز باستالعالى سولۇستىكقازاقستاندىق پوليتسەيلەر حابارسىز كەتكەن 76 ادامنىڭ جۇرگەن جەرىن انىقتادى. ءتارتىپ ساقشىلارىنىڭ ايتۋىنشا، «جوعالۋشىلاردىڭ» سانى كۇن جىلىسىمەن ارتادى. بىرەۋ سپيرتتىك ىشىمدىكتەردى اسىرا ءىشىپ، جاڭا «دوستارىمەن» قىزىققا باتسا، ەندى ءبىرى تۋعان-تۋىستارىنا جوسپارلارىن ايتپاي، جولعا شىعىپ كەتەدى. جىل باسىنان وبلىستىق پوليتسيا بولىنىستەرىنە ادامداردىڭ ءىز-ءتۇسسىز جوعالۋىنا قاتىستى 275 ءوتىنىش كەلىپ تۇسكەن، بۇگىندە ولاردىڭ 270 ى تابىلدى.
اۆتور اقەركە داۋرەنبەك قىزى
