ەلىمىزدە ەكى وبلىستا جانە ءبىر قالادا سۋبۇرقاقتاردا شومىلۋ زياندى ەكەنى انىقتالدى
قوستاناي جانە شىعىس قازاقستان وبلىستارىندا، سونداي-اق نۇر-سۇلتان قالاسىندا رۇقسات ەتىلگەن ماندەردەن اۋىتقۋ بارى انىقتالدى، دەپ حابارلايدى سانيتاريالىق- ەپيدەميولوگيالىق باقىلاۋ كوميتەتى. بۇگىنگى تاڭدا ەلىمىزدە 643 سۋبۇرقاق جۇمىس ىستەيدى، ونىڭ 318 ى (%49,4) زەرتحانالىق باقىلاۋمەن قامتىلعان. اعىمداعى جىلعى وتكەن كەزەڭدە ۆيرۋسولوگيالىق كورسەتكىشتەرگە 197 سۋ سىناماسى، باكتەريولوگيالىق كورسەتكىشتەرگە 76 سۋ سىناماسى جانە سانيتاريالىق- حيميالىق كورسەتكىشتەرگە 47 سۋ سىناماسى الىندى. سايكەس كەلمەيتىن سىنامالاردىڭ نەگىزگى كولەمى (%9,1) ۆيرۋسولوگيالىق كورسەتكىشتەر بويىنشا انىقتالعان. زەرتتەۋ ناتيجەلەرى بويىنشا رۇقسات ەتىلگەن ماندەردەن اۋىتقۋلار قوستاناي جانە شىعىس قازاقستان وبلىستارىندا، سونداي-اق نۇر-سۇلتان قالاسىندا انىقتالدى. قالعان وڭىرلەردە زەرتتەلەتىن سۋ سىنامالارىنىڭ ناتيجەلەرى نورمالاناتىن كورسەتكىشتەر شەگىندە.
جىل سايىن، جازعى كەزەڭدە مامىردان قىركۇيەككە دەيىنگى ايلاردا، ۆيرۋستىق سانيتاريالىق- حيميالىق جانە باكتەريولوگيالىق كورسەتكىشتەرگە سۋ سىنامالارىن الا وتىرىپ، سۋبۇرقاق كەشەندەرىنىڭ سۋ ساپاسىنا مونيتورينگ جۇرگىزىلەدى. سۋ مونيتورينگىنىڭ ناتيجەلەرى بويىنشا شارالار قابىلداۋ ءۇشىن جەرگىلىكتى اتقارۋشى ورگاندارعا، اۋماقتىق پوليتسيا دەپارتامەنتتەرىنە، سونداي- اق بۇرقاقتارعا قىزمەت كورسەتەتىن ۇيىمدارعا ۇسىنىمحاتتار جولداندى.
جازدا بالالاردىڭ سۇيىكتى ويىن- ساۋىقتارىنىڭ ءبىرى - سۋبۇرقاقتاردا شومىلۋ. فونتاندى شومىلۋعا ارنالعان ورىن رەتىندە ەرەسەكتەر دە پايدالاناتىن كەزدەر بولادى. مۇنداي زيانسىز ەرمەك وتە قاۋىپتى. ماسەلە مىنادا، قالالىق سۋبۇرقاقتارداعى سۋ شومىلۋعا ارنالماعان. ونىڭ قۇرامىنا دەنساۋلىققا ايتارلىقتاي زيان كەلتىرەتىن ءتۇرلى حيميالىق زاتتار قوسىلادى. ءار ءتۇرلى ينفەكسيالاردى جۇقتىرۋ قاۋپى بار. كەيىننەن ادام ونى تەك جۇقتىرىپ قانا قويماي، اۋرۋدى تاراتۋى مۇمكىن. فونتاندا شومىلۋ ءجىتى ىشەك ينفەكسياسىنا، رەسپيراتورلىق ينفەكسياعا اكەلۋى مۇمكىن، ال نەگىزگى قاۋىپ - ەنتەروۆيرۋستىق، روتاۆيرۋستىق ينفەكسيالار، سونداي-اق ا ۆيرۋستىق گەپاتيتى.
