پاۆلودارلىقتار ەرتىس سۋىنىڭ كوبىكتەنۋىنە شاعىمداندى

پاۆلودار. قازاقپارات - پاۆلودار وبلىسىنىڭ جەر قويناۋىن پايدالانۋ باسقارماسى ەرتىس سۋىندا حيميالىق كورسەتكىشتەر بويىنشا نورمادان اۋىتقۋشىلىق انىقتالماعانىن مالىمدەدى، دەپ حابارلايدى «قازاقپارات» ح ا ا ءتىلشىسى.

«الەۋمەتتىك جەلىلەردە جاريالانعان ەرتىس وزەنىندەگى كوبىككە قاتىستى شاعىم بويىنشا ەكولوگيا دەپارتامەنتىنىڭ زەرتحاناسى تالداۋ جۇرگىزۋ ءۇشىن ەرتىس وزەنە باردى. ەكولوگيا دەپارتامەنتىنىڭ زەرتحاناسى جۇرگىزگەن زەرتتەۋ ناتيجەسىنە سايكەس حيميالىق كورسەتكىشتەردىڭ اۋىتقۋى انىقتالعان جوق»، - دەپ حابارلادى پاۆلودار وبلىسىنىڭ جەر قويناۋىن پايدالانۋ باسقارماسىنان.

باسقارما گيدرولوگتارعا سىلتەمە جاساي وتىرىپ، كوبىك سۋ بەتىندە جەلدىڭ ەكپىنىمەن پايدا بولعانىن ايتتى.

«مۇندا ەشقانداي ەكولوگيالىق پروبلەما جوق»، - دەپ اتاپ ءوتتى پاۆلودار وبلىسى جەر قويناۋىن پايدالانۋ باسقارماسىنىڭ باسپا ءسوز قىزمەتىنەن.