تۇركى ەلدەرىنىڭ ارنايى قىزمەتتەرى تەرروريزممەن بىرلەسىپ كۇرەسۋگە كەلىستى
وتىرىس جۇمىسىنا قازاقستان، ازەربايجان، تۇركيا، وزبەكستان جانە قىرعىزستان ارنايى قىزمەتتەرىنىڭ باسشىلارى مەن وكىلدەرى قاتىستى.
سونداي-اق كونفەرەنسياعا باقىلاۋشى رەتىندە رەسەي مەن ماجارستان ارنايى قىزمەتتەرىنىڭ دەلەگاتسيالارى كەلدى. كەزدەسۋدە تاياۋ شىعىس جانە اۋعانستاننىڭ تەرروريزم بەلسەندىلىگى بار ايماقتارىندا قالىپتاسقان جاعداي ەسكەرىلە وتىرىپ، تۇركى مەملەكەتتەرىندەگى قاۋىپسىزدىك پەن تۇراقتىلىقتى قامتاماسىز ەتۋ باعىتىندا ارنايى قىزمەتتەردىڭ ءوزارا ءىس-قيمىلىنىڭ وزەكتى ماسەلەلەرى قارالدى.
كونفەرەنسياعا قاتىسۋشىلار اۋعانستان مەن سيريانىڭ قارۋلى قاقتىعىس ايماعىنان كەلەتىن جانە لاڭكەستىك پەن ءدىني ەكسترەميزمنىڭ تارالۋىنا بايلانىستى قاۋىپتەردى وقشاۋلاۋ بويىنشا ءوزارا ءىس-قيمىل تەتىكتەرىن قاراستىردى.
كەزدەسۋ اياسىندا قىرعىز رەسپۋبليكاسىنىڭ پرەزيدەنتى تۇركى مەملەكەتتەرىنىڭ ارنايى قىزمەتتەرىنىڭ باسشىلارىمەن كەزدەستى.
جيىنعا قاتىسۋشىلارعا ارناعان سوزىندە سادىر جاپاروۆ تۇركى مەملەكەتتەرىنىڭ مۇددەسىن قوزعايتىن سىرتقى قاۋىپ-قاتەرلەرگە قارسى تۇرۋ بويىنشا بىرلەسكەن جۇمىستا ارنايى قىزمەتتەردىڭ تىعىز ىنتىماقتاستىعى مەن كۇش-جىگەرىن بىرىكتىرۋدىڭ ماڭىزدىلىعىن اتاپ ءوتتى.
