ۇلتتىق بانك تەلەفون الاياقتارىنىڭ جاڭا سحەماسى تۋرالى ەسكەرتتى

نۇر-سۇلتان. قازاقپارات – ق ر ۇلتتىق بانكى وزدەرىن پوليتسيا نەمەسە ۇلتتىق بانك قىزمەتكەرى رەتىندە تانىستىراتىن تەلەفون الاياقتارىنىڭ كوبەيگەنىن ەسكەرتەدى، دەپ حابارلايدى قازاقپارات.

«قازاقستان ۇلتتىق بانكى وزدەرىن پوليتسيا نەمەسە ۇلتتىق بانك قىزمەتكەرى رەتىندە تانىستىراتىن تەلەفون-الاياقتارىنىڭ پايدا بولعانىن ەسكەرتەدى.

ولار «زاڭسىز ارەكەتى ءۇشىن بانك مەنەدجەرىن ۇستاۋعا ارنايى وپەراتسيا» جۇرگىزەمىز دەگەن جەلەۋمەن ازاماتتاردى نەسيە راسىمدەۋگە نەمەسە ميكروقارىز الۋعا ۇگىتتەپ، اقشانى ءۇشىنشى تۇلعانىڭ شوتىنا اۋدارۋعا كوندىرەدى»، - دەلىنگەن حابارلامادا.

ءمالىم ەتىلگەندەي، كەيدە الاياقتار پوليتسيا قىزمەتكەرى رەتىندە قوڭىراۋ شالىپ، ۇلتتىق بانكپەن ارنايى وپەراتسيا وتكىزىپ جاتقانىن ايتادى.

سەنىمدىلىك ءۇشىن تەلەفون جەلىسىنە ۇلتتىق بانك قىزمەتكەرىن قوسقان بولادى.

«ۇلتتىق بانك قۇقىق قورعاۋ جۇيەسىنىڭ نەمەسە ۇلتتىق بانكتىڭ جالعان قىزمەتكەرى تەلەفون شالعان كەزدە اڭگىمەنى توقتاتۋعا، «بانك مەنەدجەرىن ۇستاۋ» بويىنشا الاياقتىق پيعىلداعى ءىس-قيمىلدارعا قاتىسپاۋعا، دەرەۋ قۇقىق قورعاۋ ورگاندارىنا ارىز تۇسىرۋگە شاقىرادى. سونداي-اق ۇلتتىق بانك موبيلدىك قوسىمشالاردى جۇكتەۋگە، دەربەس دەرەكتەردى اشۋعا، موبيلدى تەلەفونعا قاشىقتان كىرۋگە رۇقسات بەرۋگە جانە تەلەفونمەن سويلەسۋ كەزىندە الىنعان نۇسقاۋلار بويىنشا ءۇشىنشى تۇلعالاردىڭ شوتىنا اقشا اۋدارۋعا بولمايتىنىن ەسكەرتەدى»، - دەدى ۆەدومستۆودان.

1477 قىسقا ءنومىرى بويىنشا ۇلتتىق بانكتىڭ بايلانىس ورتالىعىنا كەڭەس الۋ ءۇشىن حابارلاسۋعا بولادى.