شۋچە كولىندە كاتاماران اۋدارىلىپ، ءتورت ادام سۋعا باتىپ كەتە جازدادى
اقمولا وبلىستىق توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، شىلدەنىڭ 27 سىندە شۋچە قالالىق قۇتقارۋ ستانتسياسىنا شۋچە كولىندە كاتاماران باتىپ بارا جاتقاندىعى تۋرالى حابارلانعان.
«شاقىرۋ ورنىنا ءۇش ادامنان تۇراتىن قۇتقارۋشىلار توبى جەتتى. انىقتالعانداي، ەكى كىسىگە ارنالعان كاتامارانعا ءتورت ادام وتىرعان. سول سەبەپتى، قايىق اۋدارىلىپ، سۋعا باتىپ كەتكەن. وقيعا ورنىنا دەرەۋ جەتكەن قۇتقارۋشىلار زارداپ شەككەندەردى قايىققا سالىپ، جاعاعا شىعاردى. ءتورت دەمالۋشىنىڭ دا جاعدايى قاناعاتتانارلىق، مەديتسينالىق كومەككە مۇقتاج ەمەس»، - دەدى ۆەدومستۆودان.
ايتا كەتسەك، اقمولا وبلىسىندا شومىلۋ ماۋسىمى باستالعاننان بەرى بارلىعى 38 ادام قۇتقارىلدى، ونىڭ ەكەۋى - بالا، سونداي-اق، جەتى ادام كوز جۇمدى.
ەسكە الا كەتەيىك، بۇدان بۇرىن بۋرابايدا ءتورت ادام سۋدان قۇتقارىلعان ەدى.
