قازاقستان كوروناۆيرۋسقا قارسى شەتەلدىك ۆاكسينالاردان باس تارتۋى مۇمكىن
بۇل بولجامدى ق ر دەنساۋلىق ساقتاۋ ۆيتسە-ءمينيسترى، باس مەملەكەتتىك سانيتارلىق دارىگەر ايجان ەسماعامبەتوۆا كەلتىرىپ وتىر، دەپ حابارلايدى قازاقپارات ءتىلشىسى.
«قازىر ەلىمىزدىڭ اي سايىن 500 مىڭ دوزاعا دەيىن QazVac ۆاكسيناسىن شىعارۋ مۇمكىندىگى بار. بۇل ىشكى سۇرانىستى تولىق وتەي الادى. الداعى تامىز-قىركۇيەككە قاراي قوسىمشا 500 مىڭ دوزا QazVac قاجەت. تاپسىرىس بەرىلدى. سونىمەن قاتار، Pfizer ۆاكسيناسىن ساتىپ الۋ بويىنشا كەلىسىم ءجۇرىپ جاتىر»، - دەدى ايجان ەسماعامبەتوۆا ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ۆيتسە-مينيستر Pfizer ۆاكسيناسىنىڭ تەك جاس وسپىرىمدەرگە، جۇكتى جانە ءسابي ەمىزەتىن ايەلدەرگە عانا ەگىلەتىنىن ەسكەرتتى.
«باسقا ساناتتاعى ازاماتتارعا كوروناۆيرۋسقا قارسى Sinopharm جانە QazVac ۆاكسيناسى ۇسىنىلادى. ال، الداعى ۋاقىتتا تەك QazVac ۆاكسيناسى بولۋى مۇمكىن. سەبەبى، ءوندىرىس كولەمى ىشكى سۇرانىستى تولىق قامتي الادى»، - دەيدى ول.
سونداي-اق، ايجان ەسماعامبەتوۆا شەتەلدىك ۆاكسينالاردى اقىلى سالدىرۋعا قاتىستى پىكىر ءبىلدىردى.
«قازاقستاندىقتاردىڭ كوروناۆيرۋسقا قارسى قالاعان شەتەلدىك ۆاكسينانى سالدىرتۋ مۇمكىندىگىنىڭ بولۋىن ءبىز دە قالايمىز. ءبىراق، ول ءبىزدىڭ عانا قولىمىزدا ەمەس. جەكە ءوز باسىم Moderna جانە Pfizer ۆاكسيناسىن وندىرۋشىلەرمەن كەلىسسوز جۇرگىزدىم. وكىنىشكە قاراي، بارلىق جەتكىزۋشىلەر ۆاكسينانىڭ اقىلى بولۋىنا قارسى، ياعني كەز كەلگەن شەتەلدىك ۆاكسينا تەك مەملەكەتتىك كەلىسىمنىڭ نەگىزىندە جەتكىزىلۋى ءتيىس»، - دەدى ەلىمىزدىڭ باس مەملەكەتتىك سانيتارلىق دارىگەرى بريفينگ بارىسىندا.
ايتا كەتەيىك، قازاقستان 300 مىڭ دوزا Pfizer ۆاكسيناسىن ساتىپ الماق. سونداي-اق، ەلىمىزدە كوروناۆيرۋسقا قارسى جاڭا پرەپارات ەمدەۋ حاتتاماسىنا ەنگىزىلۋى مۇمكىن.
