16:57, 27 - شىلدە 2022 | GMT +5
استانادا تۇران داڭعىلى مەن قابانباي باتىر كوشەسىندەگى اۆتوبۋس جولاعى قايتا ىسكە قوسىلدى
نۇر-سۇلتان. قازاقپارات - بۇگىن ساعات 15:00 دەن باستاپ استانانىڭ تۇران داڭعىلى مەن قابانباي باتىر كوشەسى بويىنداعى اۆتوبۋس جولاعى قايتا ىسكە قوسىلدى، دەپ حابارلايدى قازاقپارات نۇر-سۇلتان اكىمدىگىنىڭ رەسمي سايتىنا سىلتەمە جاساپ.
سيفرلاندىرۋ جانە مەملەكەتتىك قىزمەتتەر قالالىق باسقارماسىنىڭ مالىمەتىنە سايكەس، بۇگىن م-1 كوپىرىندەگى جول جوندەۋ جۇمىستارى اياقتالدى.
سوعان بايلانىستى تۇران داڭعىلى مەن قابانباي باتىر كوشەسى بويىنداعى ارنايى جولاقپەن قوعامدىق كولىك قوزعالىسى قايتا جاندانادى.
ەسكە سالايىق، جوندەۋ جۇمىسىنا بايلانىستى باۋىرجان مومىش ۇلى داڭعىلىنان باستاپ ماڭگىلىك ەل داڭعىلى مەن سارايشىق كوشەسىنىڭ قيىلىسىنداعى كولىك ايىرىمىنا دەيىنگى ارالىقتا كولىك قوزعالىسى ءىشىنارا جابىلعان بولاتىن.
قالا تۇرعىندارى مەن قوناقتارىنا ىڭعايلى بولۋ ءۇشىن وسى ۋاقىتتا تۇران داڭعىلى مەن قابانباي باتىر كوشەسىندەگى Bus lane-مەن جەكە كولىك قوزعالىسىنا رۇقسات ەتىلگەن بولاتىن.
