كومپانيالار قاي سالا ماماندارىنا جوعارى جالاقى تولەۋگە دايىن
شولۋ HeadHunter سايتىندا جاريالانعان بوس جۇمىس ورىندارى مەن قىزمەت ىزدەگەن ازاماتتاردىڭ تۇيىندەمەلەرى نەگىزىندە ازىرلەنگەن.
ونلاين-پلاتفورما مالىمەتىنە سايكەس، بيىلعى II توقسانىندا جۇمىس بەرۋشىلەر ۇسىنعان جالاقى 1,25 پايىزعا وسكەن.
دەگەنمەن بۇل - قىزمەتكە تۇرۋعا نيەتتى ازاماتتار ءۇشىن از. ويتكەنى، جۇمىس ىزدەۋشىلەردىڭ باسىم بولىگى ورتا ەسەپپەن 295 مىڭ تەڭگە جالاقى الۋعا ءۇمىتتى. ال قازىر ۇسىنىلىپ وتىرعان ەڭبەكاقى بۇل سۇرانىستان 17,6 پايىزعا از. ياعني، بۇگىندە ەڭبەككەر ىزدەگەن كاسىپورىندار 243 مىڭ تەڭگە تولەۋگە دايىن.
ەڭ جوعارى جالاقىدان ءۇمىتتى جۇمىس ىزدەۋشىلەر ەكى قالاعا نازار قويعانى ابزال.
ولار - نۇر-سۇلتان (ورتاشا جالاقى 281 مىڭ تەڭگە) جانە الماتى (ورتاشا جالاقى 248 مىڭ تەڭگە) قالالارى.
ەلىمىزدىڭ باسقا وڭىرلەرىندە جالاقى تومەن. قازىرگى ۋاقىتتا جوعارى ەڭبەكاقى كەڭەس بەرۋ سالاسىنىڭ ماماندارىندا. بۇل سالاعا ريەلتور، دەرەكتەرگە تالداۋ جاساۋ جانە بروكەرلەر كىرەدى.
اتالعان باعىتتا قىزمەت ەتكىسى كەلەتىن ازاماتتارعا كومپانيالار ورتاشا ەسەپپەن 520 مىڭ تەڭگە جالاقى تولەمەك.
سونداي-اق، شيكىزات ءوندىرۋ سالاسىنا (گەودەزيس، ينجەنەر، گەولوگ) نازار اۋدارعان ءجون.
بۇل سالا ماماندارىنىڭ ورتاشا جالاقىسى 400 مىڭ تەڭگەدەن اسادى.
بۇعان قوسا IT تەحنولوگيالارمەن اينالىساتىن مامانداردىڭ جالاقىسى جوعارى. تاجىريبەسىز قىزمەتكەرلەر ءۇشىن ورتاشا جالاقى - 220 مىڭ تەڭگە بولسا، كوپجىلدىق قىزمەت ءوتىلى بار جۇمىسكەرلەرگە شامامەن 850 مىڭ تەڭگە ايلىق ۇسىنىلىپ وتىر.
