قىركۇيەكتە ۋنيۆەرسيتەت وقىتۋشىلارىنىڭ جالاقىسى تاعى دا كوتەرىلەدى

نۇر- سۇلتان. قازاقپارات - وسى جىلدىڭ قىركۇيەك ايىنان باستاپ ەلىمىزدە ۋنيۆەرسيتەت وقىتۋشىلارىنىڭ جالاقىسى كوتەرىلۋى كەرەك.

بۇل جايىندا ءبىلىم جانە عىلىم ءمينيسترى كەزىندەگى قىزمەتى تۋرالى ەسەپ بەرگەن وقۋ- اعارتۋ ءمينيسترى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.

«جوعارى وقۋ ورىندارى وقىتۋشىلارىنىڭ جالاقىسى كوتەرىلدى. ول ءۇشىن پرەزيدەنتتىڭ تاپسىرماسى بويىنشا 2021 -جىلى پروفەسسورلىق- وقىتۋشىلىق قۇرام جالاقىسىنىڭ ەڭ تومەنگى دەڭگەيىن بەلگىلەيتىن بۇيرىققا قول قويدىم. بۇل بۇيرىق جالاقىنى بۇرىنعىمەن سالىستىرعاندا كوبەيتۋگە مۇمكىندىك بەردى. جوعارى وقۋ ورنىنا جاڭادان كەلگەن وقىتۋشىعا 1 ستاۆكا ءۇشىن كەمىندە 200 مىڭ تەڭگە بەكىتىلدى. ال پروفەسسوردىڭ جالاقىسىنىڭ مينيمالدى دەڭگەيى 350-400 مىڭ تەڭگە بولدى. ال پەداگوگيكالىق جۇكتەمە دەڭگەيىن وقۋ جىلىنا 680 ساعاتتان اسپايتىنداي ەتىپ بەكىتتىك. سونداي- اق ۋنيۆەرسيتەتتەردەگى شامادان تىس بيۋروكراتيا مەن تىكەلەي مىندەتكە جاتپايتىن ءبىراز فۋنكسيالاردى الىپ تاستادىق»، - دەپ جازدى مينيستر Facebook پاراقشاسىندا.

سونىمەن بىرگە ول ستۋدەنتتەر مەن دوكتورانتتاردىڭ شاكىرتاقىسى وسكەنىنە توقتالدى. ياعني دوكتورانتتارعا بەرىلەتىن ستيپەنديا 3 جىل ىشىندە 82 مىڭنان 200 مىڭعا جۋىق سوماعا دەيىن ارتتى. وسى ۋاقىت ارالىعىندا جوعارى وقۋ ورىندارىنا تۇسۋگە بەرىلەتىن گرانت سانى دا ەكى ەسە ۇلعايدى.

«ەڭ باستىسى، باعدارلامالىق قۇجاتتار ارقىلى 2025 -جىلعا دەيىن ستيپەنديانى، وقىتۋشىلاردىڭ جالاقىسىن، ستۋدەنتتىك گرانتتار سانىن جانە عىلىمدى قارجىلاندىرۋدى ۇلعايتۋ ءۇشىن قارجىلاندىرۋ مەن مىندەتتەمەلەردى الدىن الا بەلگىلەپ قويدىق. ەل پرەزيدەنتىنىڭ تاپسىرماسى ارقاسىندا كوتەرىلگەن گرانت قۇنى ۋنيۆەرسيتەتتەرىمىزدەگى وقىتۋشىلاردىڭ جالاقىسىن ارتتىرۋعا مۇمكىندىك بەرەدى. ءساۋىر ايىندا جوعارى وقۋ ورىندارىنىڭ رەكتورلارىنا قوسىمشا تاپسىرما بەردىك. وسى تاپسىرماعا سايكەس 2022 -جىلدىڭ قىركۇيەگىنەن باستاپ ۋنيۆەرسيتەتتەرىمىزدەگى وقىتۋشىلاردىڭ جالاقىسى تاعى دا كوتەرىلۋى كەرەك. ول ءۇشىن قاراجات بار»، - دەدى اسحات ايماعامبەتوۆ.

اۆتور: مارلان جيەمباي