ماڭعىستاۋدا جول بويىنداعى جانجالدا كولىك جۇرگىزۋشىسىنىڭ ءبىرى ەكىنشىسىن ۇرىپ ولتىرگەن

اقتاۋ. قازاقپارات - ماڭعىستاۋدا جول بەرمەگەنى ءۇشىن اشۋعا بۋلىققان كولىك جۇرگىزۋشىلەرى جانجالداسىپ، ءبىرى ەكىنشىسىن ۇرىپ- سوعىپ ولتىرگەن، دەپ حابارلايدى قازاقپارات ءتىلشىسى.

وبلىستىق ىشكى ىستەر دەپارتامەنتى باسپا ءسوز قىزمەتىنىڭ مالىمەتىنشە، 35 جاسار كۇدىكتى 67 جاسار ەر ادامدى دەنە جاراقاتىمەن جول جيەگىنە تاستاپ كەتكەن.

«الدىن الا بولجام بويىنشا، ەكى جۇرگىزۋشى ءبىر- بىرىنە جول بەرمەي، ارالارىندا جانجال تۋىنداعان. قىلمىستىق ىسكە كۇدىكتى ەموتسياعا بوي الدىرىپ، كولىكتەن شىعىپ، 67 جاستاعى جۇرگىزۋشىنى ۇرىپ- سوققان. العان جاراقاتتارىنان كەيىن جابىرلەنۋشى سول جەردە قايتىس بولدى. وسىعان بايلانىستى قىلمىستىق كودەكستىڭ 99-بابى 2-بولىگى بويىنشا سوتقا دەيىنگى تەرگەۋ باستالدى»، - دەلىنگەن باسپا ءسوز قىزمەتىنىڭ مالىمەتىندە.

تەرگەۋ سوتىنىڭ سانكسياسىمەن كۇدىكتىگە قاتىستى ەكى اي مەرزىمگە كۇزەتپەن ۇستاۋ تۇرىندەگى بۇلتارتپاۋ شاراسى تاڭدالعان. تەرگەۋ امالدارى جالعاسىپ جاتىر.

ايتا كەتەيىك، وقيعا 22- شىلدە ساعات 20:15 شاماسىندا مۇنايلى اۋدانىنىڭ جاڭا داۋلەت كەنتىندە ورىن العان. قۇقىق قورعاۋ ورگاندارىنىڭ وكىلدەرى كولىك جۇرگىزۋشىلەرىن جولدا تۋىندايتىن كەلەڭسىز جاعدايلاردا ەموتسياعا بەرىلمەۋگە شاقىرادى.