دينارا ءسادۋاقاسوۆا دۇنيەجۇزىلىك شاحمات وليمپياداسىنا قاتىسۋدان باس تارتتى
بۇل تۋرالى ول الەۋمەتتىك جەلىدەگى پاراقشاسىندا جازدى، دەپ حابارلايدى قازاقپارات ءتىلشىسى.
«وسى جازدا مەن ءۇندىستاندا وتەتىن دۇنيەجۇزىلىك شاحمات وليمپياداسىنا قاتىسۋدان باس تارتۋ تۋرالى شەشىم قابىلدادىم. ءبىرقاتار مىندەتتەمەلەرگە بايلانىستى جاۋاپتى شاراعا دايىندالا المادىم. دەگەنمەن الداعى جارىستارعا مىندەتتى تۇردە قاتىسامىن دەگەن سەنىمدەمىن. بۇل ءۇشىن نەگىزگى فاكتور - وقىتۋدىڭ ءتيىستى دەڭگەيىنە قاجەتتى بارلىق رەسۋرستىڭ جەتكىلىكتى مولشەرى»، - دەپ جازدى ول Instagram- داعى پاراقشاسىندا.
شاحماتشى قىز جارىسقا قاتىساتىن سپورتشىلارعا ساتتىلىك تىلەدى.
«ارينە، بۇگىن مەن بارشا قازاق سپورتشىلارىنا كۇش-قۋات، ساتتىلىك تىلەيمىن. ارىپتەستەرىمنىڭ ابىرويمەن ونەر كورسەتىپ، جوعارى كاسىبي شەبەرلىكتەرىن كورسەتە الاتىنىنا سەنىمدىمىن»، - دەپ جازدى دينارا ءسادۋاقاسوۆا.
بۇعان دەيىن شاحماتتان قازاقستان ايەلدەر قۇراماسىنىڭ جاتتىقتىرۋشىسى الەكساندر مويسەەنكو الداعى دۇنيەجۇزىلىك شاحمات وليمپياداسىندا كوماندا الدىندا ۇزدىك ۇشتىككە ەنۋ مىندەتى تۇرعانىن ايتقان بولاتىن.
28- شىلدە مەن 10- تامىز ارالىعىندا ءۇندىستاننىڭ چەنناي قالاسىندا شاحماتشىلاردىڭ 44-وليمپياداسى وتەدى.
ەسكە سالايىق، ءبىر اي بۇرىن ق ر پرەزيدەنتى قاسىم-جومارت توقايەۆ شاحماتتان قازاقستان ايەلدەر قۇراماسىنىڭ مۇشەلەرىمەن جانە شاحمات فەدەراتسياسىنىڭ وكىلدەرىمەن كەزدەسكەن بولاتىن.
