ا ق ش كومپانياسى قازاقستاندا جاسىل رەاكتيۆتى وتىن ءوندىرۋدى قاراستىرىپ جاتىر
ق ر پرەمەر-ءمينيسترى ءاليحان سمايىلوۆ Honeywell كومپانياسىنىڭ باسشىلىعىمەن - ءوسۋ قارقىنى جوعارى جاھاندىق وڭىرلەر بويىنشا پرەزيدەنت بەن دريگگسپەن جانە تۇركيا، يزرايل جانە ورتالىق ازياداعى قارقىندى ءوسۋ وڭىرلەرى بويىنشا پرەزيدەنت ۋيگار دويۋرانمەن كەزدەستى.
تاراپتار ەكونوميكانى دەكاربونيزاتسيالاۋ، ونەركاسىپكە زاماناۋي جاسىل تەحنولوگيالاردى ەنگىزۋ ماسەلەلەرىن، سونداي-اق Honeywell- ءدىڭ ەلىمىزدە جاڭا جوبالاردى ىسكە قوسۋ جونىندەگى جوسپارلارىن تالقىلادى.
ءاليحان سمايىلوۆ ءوز سوزىندە قازاقستاننىڭ ورتالىق ازياداعى ينۆەستيتسيالار ءۇشىن ەڭ تارتىمدى ەل بولىپ قالا بەرەتىنىن، وعان ۇكىمەتتىڭ ينۆەستيتسيالىق احۋالدى جاقسارتۋ جانە شەتەلدىك كاپيتالدى قۇقىقتىق قورعاۋ بويىنشا ىسكە اسىرىپ جاتقان شارالارى ىقپال ەتەتىنىن اتاپ ءوتتى.
«ءبىز شەتەلدىك سەرىكتەستەر الدىنداعى ءوز مىندەتتەمەلەرىمىزدى ورىنداۋدى جالعاستىرامىز جانە ودان ءارى ىنتىماقتاستىق ءۇشىن بارلىق قاجەتتى جاعدايدى جاساۋعا دايىنبىز»، - دەدى ق ر پرەمەر-ءمينيسترى.
ءوز كەزەگىندە بەن دريگگس قازىرگى ۋاقىتتا Honeywell كومپانياسىنىڭ قازاقستاندا كومىرسۋتەكتەردى تۇتۋ جانە پلاستيكتى قايتا وڭدەۋ تەحنولوگيالارىمەن، سونداي-اق جاسىل رەاكتيۆتى جانە ديزەل وتىنىن وندىرۋمەن بايلانىستى جوبالاردى ىسكە اسىرۋ مۇمكىندىگىن قاراستىرىپ جاتقانىن حابارلادى.
«سىزدەردىڭ ەلىمىزدىڭ اۋماعىندا جاڭا ينۆەستيتسيالىق جوبالاردى ىسكە قوسۋ جونىندەگى جوسپارلارىڭىزدى قۇپتايمىز. وسىعان بايلانىستى ۇكىمەت اتالعان باعىتتار بويىنشا ىنتىماقتاستىقتى ارتتىرۋعا جانە قاجەتتى قولداۋ كورسەتۋگە نيەتتى ەكەنىن اتاپ وتكىم كەلەدى»، - دەپ تۇيىندەدى ءاليحان سمايىلوۆ.
Honeywell - ەلەكتروندى باسقارۋ جانە اۆتوماتتاندىرۋ جۇيەلەرىن شىعاراتىن امەريكالىق كورپوراتسيا.
نەگىزگى باعىتتار - اەروعارىشتىق جابدىقتار، عيماراتتار مەن ونەركاسىپتىك قۇرىلىستاردى پايدالانۋعا ارنالعان تەحنولوگيالار، اۆتوموبيل جابدىقتارى، تۋربوكومپرەسسورلار.
