ادام ساۋداسىنا قاتىستى ەلىمىزدە قانداي قىلمىستار انىقتالادى

نۇر-سۇلتان. قازاقپارات – ق ر ىشكى ىستەر مينيسترلىگى ۇيىمداسقان قىلمىسقا قارسى كۇرەس دەپارتامەنتى باسشىسىنىڭ مىندەتىن اتقارۋشى قانات نۇرماعامبەتوۆ ەلىمىزدە ادام ساۋداسىنا قاتىستى قانداي قىلمىستار انىقتالىپ جاتقانىن ايتتى، دەپ حابارلايدى قازاقپارات ءتىلشىسى.

«وكىلەتتى ورگاندار بۇل سالادا ءتيىستى جۇمىستاردى اتقارىپ جاتىر. وسى ورايدا مينيسترلىك جۇيەلى تۇردە رەسپۋبليكالىق ءارى جەدەل الدىن الۋ ءىس-شارالارىن وتكىزىپ تۇرادى. جالپى، جىل سايىن وسى ساناتتاعى 100 گە دەيىن سوتقا دەيىنگى تەرگەۋ تىركەلىپ وتىر»، - دەدى ق. نۇرماعامبەتوۆ ورتالىق كوممۋنيكاتسيالار قىزمەتىندەگى دوڭگەلەك ۇستەل وتىرىسىندا.

ونىڭ ايتۋىنشا، باسقا ەلدەرگە ادامداردى زاڭسىز شىعارۋمەن اينالىسىپ كەلگەن ۇيىمداسقان توپتاردىڭ ارەكەتتەرىنە توسقاۋىل قويىلىپ كەلەدى.

«2021-جىلدىڭ جەلتوقسان ايىندا ترانسۇلتتىق قىلمىستىق توپتىڭ 17 مۇشەسى ءتۇرلى مەرزىمگە جازاعا تارتىلدى. ولار ادام ساۋداسىمەن اينالىسقان جانە ادامداردى باحرەين كورولدىگىنە جەتكىزىپ وتىرعان»، - دەدى ول.

ب ۇ ۇ مالىمەتتەرىنە قاراعاندا، ادام ساۋداسى بويىنشا ەڭ كوپ تاراعان باعىتى اياسىندا ايەلدەر سەكسۋالدى ماقساتتا پايدالانۋ ءۇشىن قۇلدىققا جەگىلەدى. وسى ورايدا ادام ترافيگىنە بايلانىستى جاعدايلاردىڭ 54 پايىزى اتالعان قىلمىسقا تيەسىلى.

«ەلىمىزدە دە ادام ساۋداسىندا ايەلدەردى سەكسۋالدى ماقساتتا پايدالانۋ ءتۇرى كەڭىنەن تاراعان. ال ەر ادامداردى ءماجبۇرلى تۇردە جۇمىسقا سالادى. سونىمەن قاتار، اسىراپ الۋ ءۇشىن نارەستەلەر مەن بۇلدىرشىندەردى ساتۋ فاكتىلەرى دە انىقتالىپ جاتىر»، - دەدى قانات نۇرماعامبەتوۆ.