پياز ەكسپورتىنا شەكتەۋ قويۋعا قارسىمىز - مينيستر

نۇر-سۇلتان. قازاقپارات – ق ر اۋىل شارۋاشىلىعى مينيسترلىگى پيازدى سىرتقا شىعارۋعا شەكتەۋ قويۋ جونىندەگى ۇسىنىستى قولدامايدى.

بۇل تۋرالى ۆەدومستۆو باسشىسى ەربول قاراشوكەيەۆ ءمالىم ەتتى، دەپ حابارلايدى قازاقپارات ءتىلشىسى.

«كوكونىس ونىمدەرى اراسىندا پيازدىڭ باعاسى ءوستى. وسى ورايدا، ىشكى نارىقتا پيازدىڭ قورى جەتكىلىكتى ەكەنىن اتاپ وتكىم كەلەدى. ماسەلەن، اي سايىنعى قاجەتتىلىك 25,9 مىڭ توننا بولسا، بۇگىنگى كۇنى پياز قورى 34,4 مىڭ توننانى قۇرايدى. ماۋسىم ايىنان باستاپ ەرتە پىسەتىن پياز جينالىپ جاتىر. ونىڭ جالپى كولەمى 90 مىڭ توننادان اسادى دەپ كۇتىلۋدە. بۇگىندە 35,2 مىڭ تونناسى جينالدى. شىلدە ايىنىڭ سوڭىنا دەيىن جانە تامىزدىڭ ءبىرىنشى جارتىسىندا 50 مىڭ توننادان استام پياز جيناۋ جوسپارلانعان»، - دەدى ول ورتالىق كوممۋنيكاتسيالار قىزمەتىندە وتكەن بريفينگىدە.

سونداي-اق، مينيستر كەيىنگى كەزدە پيازدى قازاقستان اۋماعىنان سىرتقا شىعارۋعا شەكتەۋ شارالارىن ەنگىزۋ ماسەلەسى تالقىلانىپ جاتقانىن ەسكە سالدى.

«مينيسترلىك بۇل ماسەلەنى قولدامايتىنىن اتاپ وتكىم كەلەدى. قازىرگى ۋاقىتتا مينيسترلىك تۇركىستان جانە جامبىل وبلىستارى اكىمدىكتەرىمەن بىرلەسىپ، پياز وندىرۋشىلەر مەن وزگە وبلىستار، قالالار اكىمدىكتەرى اراسىندا كەلىسىمشارتتار جاساسۋ جۇمىستارىن جۇرگىزۋدە. كەزدەسۋ قورىتىندىسى بويىنشا پياز ساتۋ باعاسى كەلىسىنە 220 تەڭگەدەن 110 تەڭگەگە دەيىن تومەندەدى. سونىمەن قاتار، قىركۇيەكتەن باستاپ كۇزگى پيازدى جيناۋ باستالادى. ونىڭ كولەمى 1 ميلليون توننادان استام بولادى دەپ بولجانىپ وتىر. ول ىشكى نارىقتىڭ قاجەتتىلىگىن تولىق كولەمدە قامتاماسىز ەتەدى. وسىلايشا، پياز كولەمىنىڭ جەتكىلىكتىلىگىن جانە شەكتەۋ شارالارىن ەنگىزۋدىڭ قاجەتى جوق ەكەنىن اتاپ وتەمىن»، - دەدى ەربول قاراشوكەيەۆ.

ونىڭ ايتۋىنشا، قازاقستاندا قانت باعاسىنىڭ شارىقتاۋىنا برازيليا قانتىنا تاۋەلدىلىك سەبەپ بولعان.