ەتتىڭ قىمباتتاۋىنا ەشقانداي نەگىز جوق - ۆيتسە-پرەمەر
«نەگىزى مال شارۋاشىلىعىمەن اينالىساتىن تاۋار وندىرۋشىلەرمەن، فەرمەرلىك قوجالىق باسشىلارىمەن كەزدەسكەندە ءبارى ءبىر پروبلەمانى ايتادى. ەتتىڭ ساتىپ الۋ باعاسى وتە تومەن. ورتاشا العاندا، ءتىرى سالماقتاعى ەتتىڭ ءبىر كەلىسى 700-800 تەڭگەدەن اسپايدى دەپ وتىر. سول سەبەپتى مال شارۋاشىلىقتارىنىڭ نەگىزگى پروبلەماسى - باستاپقى ساتىپ الۋ باعاسى وتە تومەن بولۋىندا. باعانىڭ ءارى قاراي قالىپتاسۋى ساۋدا جۇيەلەرىنە بايلانىستى. باعا سول جاقتا ءوسىپ جاتىر. قازىرگى تاڭدا بىزدە ەتتىڭ باعاسى نەگىزىنەن تۇراقتى. بيىل ەت ءوندىرۋ كولەمىندە دە، مال باسىندا دا ءوسىم بار. سول سەبەپتى تاۋەكەل جوق دەپ ەسەپتەيمىز»، - دەدى مينيستر ورتالىق كوممۋنيكاتسيالار قىزمەتىندە وتكەن بريفينگىدە.
بۇل ءۋاجدى ق ر پرەمەر-ءمينيسترىنىڭ ورىنباسارى - ساۋدا جانە ينتەگراتسيا ءمينيسترى باقىت سۇلتانوۆ تا قۋاتتادى.
«ەت باعاسىنىڭ وسۋىنە ەشقانداي نەگىز جوق. دەلدالدار تۋرالى ايتىپ وتىرسىز، بۇگىنگى تاڭدا تاۋار ءوندىرۋشى فەرمەرلەردەن ەتتىڭ باعاسى ورتاشا ەسەپپەن 900 تەڭگەدەن الىنادى. ءارى قاراي نارىققا جەتكەنشە مونوپوليالار، باسقا دا دەلدالدار، وليگوپوليالار ارقىلى باعا ءوسىپ كەتەدى. بۇل جاعىنان ءبىز جۇمىس ىستەپ جاتىرمىز. بازار يەلەرىنىڭ، اكىمشىلەرىنىڭ جاۋاپكەرشىلىگىن ارتتىرۋ باعىتىندا زاڭنامالىق وزگەرىستەر ەنگىزىپ جاتىرمىز. سونداي-اق، جەرگىلىكتى ورگاندارمەن بىرلەسىپ، كىشىگىرىم ساۋدا وبەكتىلەرىندە ۇستەمە باعانى 15 پايىزدان اسىرماۋ تۋرالى باعىتىندا ءتيىستى شارالار جۇرگىزىلىپ جاتىر. ءۇيدىڭ قاسىنداعى شاعىن دۇكەندەردىڭ ءتيىستى جاۋاپكەرشىلىگىن ارتتىرۋ ءۇشىن قوسىمشا شارالار ەنگىزىلەدى»، - دەدى ۆيتسە-پرەمەر.
بۇعان دەيىن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ قانت تاپشىلىعىن رەتتەي الماعان ساۋدا جانە ينتەگراتسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەيەۆكە سوگىس جاريالاعان ەدى.
