مينيسترلەر سوڭعى رەت قانتتى نەشە تەڭگەدەن ساتىپ العانىن ايتتى

نۇر-سۇلتان. قازاقپارات - ورتالىق كوممۋنيكاتسيالار قىزمەتىندە ءوتىپ جاتقان بريفينگىدە ق ر پرەمەر-ءمينيسترىنىڭ ورىنباسارى - ساۋدا جانە ينتەگراتسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەيەۆ قانتتى قانشالىقتى ءجيى قولداناتىنىن ايتتى ، دەپ حابارلايدى قازاقپارات ءتىلشىسى.

«جالپى «قانت جوق» دەپ ايتا بەرۋگە بولمايدى.

«حالۆا، حالۆا» دەگەننەن اۋزىڭا ءتاتتى ءدام كەلمەيدى» دەگەن ءسوز بار عوي. سول سياقتى «جوق-جوق» دەگەن سايىن حالىق سەنىپ، دۇربەلەڭ تۋادى. ءوز باسىم جۋىقتا عانا ءىرى ساۋدا جەلىسىنە بارىپ، ءبىر كەلى قانتتى 470 تەڭگەگە ساتىپ الدىم. ول كەزدە سونداي باعا بولعان. قازىرگى اقپارات بويىنشا باعا 480 تەڭگە بولىپتى. ونى كورىپ-ءبىلىپ وتىرمىن. مەن ءوزىم شاي ىشكەندە قانت قولدانبايمىن، بالمەن ىشەم»، - دەدى باقىت سۇلتانوۆ.

ال ەربول قاراشوكەيەۆكە ودان ءسال قىمبات قانت بۇيىرعان كورىنەدى.

«سوڭعى رەت قانتتىڭ كەلىسىن ۇلكەن ءبىر ساۋدا جۇيەسىنەن 620 تەڭگەنىڭ كولەمىندە ساتىپ الدىق. ال 1000 تەڭگەدەن ۇيلەردىڭ استىنداعى شاعىن دۇكەندەردە ساتىلىپ جاتىر. ولار كوتەرمە باعامەن ساتىپ الا المايدى. سوندىقتان ەكىنشى، ءۇشىنشى قولدان الىپ، وسىنداي باعامەن ساتىپ جاتىر. سوندا سوڭعى رەت قانتتى 620 تەڭگەدەن ساتىپ الدىم. شايدى قانتسىز ىشەمىن»، - دەدى اۋىل شارۋاشىلىعى ءمينيسترى.

بۇعان دەيىن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ قانت تاپشىلىعىن رەتتەي الماعان ساۋدا جانە ينتەگراتسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەيەۆكە سوگىس جاريالاعان ەدى.