قىزىلوردا وبلىسىنىڭ بۇرىنعى اكىمى جازاسى جەڭىلدەتىلىپ، بوستاندىققا شىقتى

قىزىلوردا. قازاقپارات - قىزىلوردا وبلىسىنىڭ بۇرىنعى اكىمى قۋانىشبەك ىسقاقوۆ جازاسىنىڭ وتەلمەگەن بولىگى باس بوستاندىعىن شەكتەۋ جازاسىمەن اۋىستىرىلدى، دەپ حابارلايدى قازاقپارات ءتىلشىسى.

ايتا كەتسەك، 2020 -جىلدىڭ جەلتوقسانىندا ق. ىسقاقوۆ قىزىلوردا قالاسىنىڭ №2-سوتىنىڭ ۇكىمىمەن ق ر قىلمىستىق كودەكسىنىڭ 190-بابى 4-بولىگى 2-تارماعىمەن كىنالى دەپ تانىلدى. مەملەكەتتىك قىزمەتپەن اينالىسۋ قۇقىعىنان ءومىر بويىنا ايىرىلىپ، 7 جىلعا سوتتالعان. سونداي-اق، جازاسىن قىلمىستىق- اتقارۋ جۇيەسىنىڭ ورتاشا قاۋىپسىز مەكەمەلەرىندە وتەۋ بەلگىلەنگەن. جازا وتەۋ مەرزىمى 2020 -جىلدان باستاپ ەسەپتەلگەن.

«ۇكىم قىزىلوردا وبلىستىق سوتىنىڭ قىلمىستىق ىستەر جونىندەگى سوت القاسىنىڭ قاۋلىسىمەن وزگەرىسسىز قالدىرىلدى، ال ق ر جوعارعى سوتىنىڭ قىلمىستىق ىستەر جونىندەگى سوت القاسىنىڭ قاۋلىسىمەن جازا تاعايىنداۋ بولىگى وزگەرتىلدى. باس بوستاندىعىنان ايىرۋ جازا مەرزىمى 6 جىل مەرزىمگە دەيىن تومەندەتىلدى. قۋانىشبەك ىسقاقوۆ سوتتان جازاسىنىڭ وتەلمەگەن بولىگىن نەعۇرلىم جەڭىل جازا تۇرىمەن، ياعني ايىپپۇل تۇرىنە نەمەسە باس بوستاندىعىن شەكتەۋ جازاسىنا اۋىستىرۋدى سۇراعان. سوتتا ز ك-169/5 مەكەمەسى ر م م-نىڭ وكىلى سوتتالعانعا بەرىلگەن مىنەزدەمەنى قۋاتتاپ، جازاسىن وتەۋ بارىسىندا بەلگىلەنگەن ىشكى كۇن ءتارتىبى ەرەجەلەرىن جانە رەجيم تالاپتارىن بۇزۋشىلىعى بولماعانىن اتاپ ءوتتى. وعان قوسا ەكى كوتەرمەلەۋ شاراسى قولدانىلعانىن، جازالاۋ شاراسى جوق ەكەنىن، جەڭىلدەتىلگەن جاعدايدا ۇستالاتىنىن، دارەجەسى ەكىنشى وڭ مىنەز- قۇلىقتى دەپ ايقىندالعانىن مالىمدەدى»، - دەپ ءمالىم ەتتى قىزىلوردا قالاسىنىڭ №2-سوتىنان. ۆەدومستۆو مالىمەتىنشە، سوت ۇكىم بويىنشا تالاپ ارىز نەگىزىندە وندىرىلگەن قىلمىسپەن كەلتىرىلگەن مۇلىكتىك زالال، مەملەكەت پايداسىنا مەملەكەتتىك باج شىعىنى، مەملەكەت پايداسىنا پروتسەستىك شىعىن، وتەماقى قورى تولىق وتەلگەنىن، جازانى وتەۋدىڭ بەلگىلەنگەن ءتارتىبىن قاسكويلىكپەن بۇزباعانى كورسەتىلگەن.

جابىرلەنۋشى وكىلى جازانىڭ وتەلمەگەن بولىگىن نەعۇرلىم جەڭىل جازا تۇرىنە اۋىستىرۋ تۋرالى ءوتىنىشحاتىنا قارسى ەمەس ەكەندىگىن ءبىلدىردى.

«ق ر قىلمىستىق كودەكسىنىڭ 73-بابى 1-بولىگىنە ساي ونشا اۋىر ەمەس، اۋىرلىعى ورتاشا نەمەسە اۋىر قىلمىس ءۇشىن باس بوستاندىعىنان ايىرۋدى وتەپ جاتقان ادامعا، ول قىلمىسپەن كەلتىرىلگەن زالالدى تولىق وتەگەن نە جازانى وتەۋدىڭ بەلگىلەنگەن ءتارتىبىن قاسكويلىكپەن بۇزباعان جاعدايدا، سوت جازانىڭ قالعان وتەلمەگەن بولىگىن نەعۇرلىم جەڭىل جازا تۇرىمەن اۋىستىرۋى مۇمكىن. وسى نەگىزبەن سوتتالعان قۋانىشبەك ىسقاقوۆتىڭ جازاسىنىڭ وتەلمەگەن بولىگىن نەعۇرلىم جەڭىل جازا تۇرىنە اۋىستىرۋ تۋرالى ءوتىنىشحاتى قاناعاتتاندىرىلدى. جازاسىنىڭ وتەلمەگەن بولىگى (3 جىل 11-اي 12 كۇن) مەرزىمى، جازانىڭ قوسىمشا ءتۇرىن وتەۋدەن بوساتۋسىز، جازانىڭ نەعۇرلىم جەڭىل ءتۇرى باس بوستاندىعىن شەكتەۋ جازاسىمەن اۋىستىرىلدى»، - دەپ تولىقتىردى قىزىلوردا قالاسىنىڭ №2-سوتىنان.