ورتاشا جىلدامدىق جۇيەسى جول ەرەجەسىن بۇزعانداردى قالاي انىقتايدى
«بۇل جۇيەنى ەنگىزۋ بويىنشا باسقا زاڭ ورگاندارىمەن كەلىسىم جۇرگىزىلىپ جاتىر. ەگەر بۇل جوبا ەنگىزىلەتىن بولسا، ول تەك ۇلكەن تاس جولداردا قولدانىلادى، قالا ىشىندە قولدانىلمايدى.
«ورتاشا جىلدامدىق» جۇيەسى بەينەكامەرالار ارقىلى كولىكتىڭ ا نۇكتەسىنەن ب نۇكتەسىنە دەيىن قانشا ۋاقىتتا جەتكەنىن انىقتايدى. كەيىن اۆتوكولىكتىڭ وسى ارالىقتا قانداي جىلدامدىقپەن جۇرگەنىن اۆتوماتتى تۇردە ەسەپتەپ، ورتاشا جىلدامدىعىن شىعارادى. ەگەر ەسەپتەۋ بارىسىندا جىلدامدىعى جوعارى بولعانى انىقتالسا، وندا اكىمشىلىك جاۋاپكەرشىلىككە تارتىلادى. قازىرگى ۋاقىتتا بۇل زاڭ ءالى تالقىلاۋدان ءوتىپ جاتىر. شامامەن قىركۇيەك ايىندا وزگەرىستەر ەنگىزەمىز دەپ ويلايمىز»، - دەدى اكىمشىلىك پوليتسيا كوميتەتى ءتوراعاسىنىڭ ورىنباسارى. بۇدان بولەك بريفينگ بارىسىندا جاندوس مۇراتاليەۆ ايىپپۇلدى 50 پايىز جەڭىلدىكپەن تولەۋ قۇقىعىنان قانداي ساناتتاعى جۇرگىزۋشىلەر ايىرىلاتىنىن ايتتى.
قوسا كەتسەك، بۇعان دەيىن قازاقستاندا «ورتاشا جىلدامدىق» جۇيەسىن ەنگىزۋ جوسپارلانىپ وتىرعانىن جازعان بولاتىنبىز.
