مينيستر قانتتىڭ شىنايى باعاسى قانشا بولۋى كەرەكتىگىن ايتتى

نۇر-سۇلتان. قازاقپارات – ق ر اۋىل شارۋاشىلىعى ءمينيسترى ەربول قاراشوكەيەۆ ورتالىق كوممۋنيكاتسيالار قىزمەتىندە وتكەن بريفينگتە قانتتىڭ ادىلەتتى باعاسى نەشە تەڭگە بولۋ كەرەكتىگىن ايتتى، دەپ حابارلايدى قازاقپارات ءتىلشىسى.

«مىسالى، قانت قۇراعىنىڭ قۇنى - شامامەن 476 ا ق ش دوللارى. بۇل 2020 -جىلمەن سالىستىرعاندا 2 ەسە كوپ. لوگيستيكا شىعىندارى 110 ا ق ش دوللارىنان 290 ا ق ش دوللارىنا دەيىن 2,6 ەسە ءوستى. اتالعان فاكتىلەر وتاندىق قانت زاۋىتتارىندا قۇراق قانتىنىڭ وزىندىك قۇنىنىڭ قىمباتتاۋىنا الىپ كەلدى. بۇگىنگى تاڭدا زاۋىتتار 1 كيلوگرام قانتتى 450 تەڭگەگە ساتادى. بۇل رەتتە %15 كوتەرمە جانە بولشەك ساۋدا ۇستەمەسىن ەسكەرە وتىرىپ، قانت قۇنى شامامەن كەلىسىنە 595-600 تەڭگە بولۋى قاجەت»، - دەدى ۆەدومستۆو باسشىسى.

سونداي-اق، ول قانتتى ادىلەتتى باعامەن ساتپاۋدىڭ سالدارىنان دۇربەلەڭ تۋىنداپ، قانتقا دەگەن سۇرانىستى شەكتەن تىس ارتتىرىپ جىبەرگەنى تۋرالى ءۋاج ايتتى.

«جەكەلەنگەن اكىمدىكتەر قانتتى وزىندىك قۇنىنان تومەن باعامەن ساتۋ فاكتىلەرى دە بولعان. مىسالى، پاۆلودار وبلىسىنىڭ تۇراقتاندىرۋ قورى قانتتى 448 تەڭگەگە ساتىپ الىپ، 416 تەڭگەگە، ال قىزىلوردا وبلىسى 450 تەڭگەگە ساتىپ الىپ، 370 تەڭگەدەن قانت ساتقان. الماتى وبلىسىندا قانتتىڭ ءبىر كەلىسىن 276 تەڭگەدەن، اقتوبە وبلىسىندا 363 تەڭگەدەن، ماڭعىستاۋ وبلىسىندا 400 تەڭگەدەن ساتقان. اكىمدىكتەر تاراپىنان وسى ءىس- ارەكەتتەر دۇرلىكپە سۇرانىس پەن الەۋمەتتىك شيەلەنىستىڭ تۋىنداۋىنا اكەپ سوقتىرۋدا»، - دەيدى ەربول قاراشوكەيەۆ.

ەسكە سالساق، ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ قانت تاپشىلىعىن رەتتەي الماعان ساۋدا جانە ينتەگراتسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەيەۆكە سوگىس جاريالاعان ەدى.