باقىت سۇلتانوۆ ازىق- تۇلىك باعاسىن ارنايى پلاتفورما ارقىلى قاداعالاۋدى ۇسىندى
«مەملەكەت باسشىنىڭ تاپسىرماسى اياسىندا ۇكىمەت جىل اياعىنا دەيىن وتاندىق اۋىل شارۋاشىلىعى وندىرۋشىلەرىنىڭ ونىمدەرىن ءىرى ساۋدا جەلىلەرىنە جەتكىزۋدى قولداۋعا باعىتتالعان زاڭنامالىق باستامالاردى ۇسىنباق. مىسالى، سورەلەرگە قولجەتىمدىلىكتى قامتاماسىز ەتۋ، ۇستەمەاقى شەگىن رەتتەۋ جانە دەلدالدار سانىن ازايتۋ شارالارى پىسىقتالادى»، - دەدى ول ورتالىق كوممۋنيكاتسيالار قىزمەتىندە وتكەن بريفينگىدە.
سونداي-اق، مينيستر Qdate اناليتيكالىق پلاتفورماسىنىڭ نە ءۇشىن قۇرىلىپ جاتقانىن ءتۇسىندىردى.
«ول ىشكى ساۋدانىڭ جاي- كۇيىنە، ينفراقۇرىلىم جۇكتەمەسىنە، يمپورت- ەكسپورت ديناميكاسىنا، تاۋارلار مەن قىزمەتتەر باعاسىنىڭ وزگەرۋىنە تالداۋ مەن مونيتورينگ جاساپ، مەملەكەتتىك ورگاندارعا ساپالى اناليتيكا ۇسىنادى. بۇل تالداۋلاردىڭ ءبارى اشىق جاريالانادى. سونىڭ ارقاسىندا بيزنەستە ءادىل باسەكە قالىپتاسىپ، تۇتىنۋشىلارعا ساپالى ءونىمدى قولجەتىمدى باعامەن الۋ مۇمكىندىگى تۋادى»، - دەدى باقىت سۇلتانوۆ.
ەسكە سالساق، ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ قانت تاپشىلىعىن رەتتەي الماعان ساۋدا جانە ينتەگراتسيا ءمينيسترى باقىت سۇلتانوۆ پەن اۋىل شارۋاشىلىعى ءمينيسترى ەربول قاراشوكەيەۆكە سوگىس جاريالاعان ەدى.
