09:25, 26 - شىلدە 2022 | GMT +5
جاس جىگىت جالعىزباستى ايەلدىڭ ۇيىنە پىشاقپەن كىرىپ، توناپ كەتكەن
الماتى. قازاقپارات - الماتىدا جالعىزباستى ايەلدىڭ ۇيىنە پىشاقپەن كىرىپ، توناپ كەتكەن قاراقشى ۇستالدى، دەپ حابارلايدى قازاقپارات ءتىلشىسى.
الماتى قالالىق پوليتسيا دەپارتامەنتىنىڭ مالىمەتىنشە، 19 جاستاعى ەر ادام تۇندە جالعىزباستى ايەلدىڭ پاتەرىنە كىرىپ، ونى پىشاقپەن قورقىتقان. سولاي، جيناعان اقشاسى مەن باعالى زاتتارىن بەرۋدى تالاپ ەتكەن.
«قاتتى قورىققان جابىرلەنۋشى ونىڭ ايتقاندارىن بۇلجىتپاي ورىنداعان. كۇدىكتى ونىڭ تەلەفونىن دا يەمدەنىپ، كەيىن موبيلدىك قوسىمشا ارقىلى بانك شوتىنداعى اقشاسىن شەشىپ العان»، - دەدى اۋەزوۆ اۋداندىق پوليتسيا باسقارماسىنىڭ باستىعى ۇلان ءابىلقايىر.
ونىڭ ايتۋىنشا، ايەلدەن پوليتسياعا ارىز تۇسە سالىسىمەن دەرەۋ جەدەل توپ قۇرىلعان. ناتيجەسىندە قاراقشىلىق شابۋىل جاساعان ادام انىقتالىپ، قاماۋعا الىندى.
«قازىر كۇدىكتى ۋاقىتشا ۇستاۋ يزولياتورىنا قامالدى. ول - الماتى وبلىسى، پانفيلوۆ اۋدانىنىڭ تۇرعىنى»، - دەپ اتاپ ءوتتى پوليتسيا وكىلى.
