كىتاپ وقىپ، قوزى ال

نۇر-سۇلتان.قازاقپارات - تۇركىستان وبلىسى ورداباسى اۋدانىندا ەل اعالارى بالالاردى كىتاپ وقۋعا قىزىقتىرۋدىڭ وسىنداي ەرەكشە جولىن تاپقان. ولار ەڭ كوپ كوركەم شىعارما وقىپ، تۇسىنىگىن ايتىپ بەرگەن بالاعا ءبىر- ءبىر قوزىدان بەرىپ جاتىر.

بۇل ءاليحاننىڭ كىتاپ وقىپ، تاپقان العاشقى مالى. قولى قالت ەتسە بولدى قوزىسىنا جەم- سۋىن بەرىپ، جاعدايىن جاسايدى. ءوز ەڭبەگىمەن تاپقاندىقتان بولسا كەرەك قوڭىر قوزىسىنا دەگەن ماحابباتى دا ەرەكشە.

ءاليحان شىلتەربەك، وقۋشى:

- مەنى كىتاپحاناشى اپاي شاقىرىپ، «كىتاپ وقىساڭ سىيلىققا قوزى بەرەمىن» دەدى. باسىندا سەنگەن جوقپىن. كىتاپ وقىعان سوڭ بەردى.

وسى بايقاۋدان كەيىن 6-سىنىپتا وقيتىن ءبۇلدىرشىن كىتاپتان باس المايتىن بولدى. كىتاپ وقىعان ادامنىڭ وي- ءورىسى ءوسىپ، ءتىل بايلىعى ارتاتىنىن جاقسى تۇسىنگەن ءاليحان قازىر قازاق ەرتەگىلەرى جيناعىن، «التىن ساندىق» كىتابىن تاۋىسقان. بۇگىن مەكتەپ كىتاپحاناسىنا بارىپ، جاڭا كىتاپ جازدىرتىپ الدى. بايقاۋعا اۋىلداعى ەل اعالارى باستاماشى بولعان.

«بۇل جەردە ماقساتىمىز سىيلىق ەمەس، بالانىڭ نازارىن كىتاپقا اۋدارتۋ» بولدى دەيدى.

سەرعالي قۇرىمبەكوۆ، ءبورجار اۋىلىنىڭ اكىمى:

- كىتاپحاناعا ەڭ كوپ كەلىپ جۇرگەن 3 وقۋشىنى الىپ، كىتاپتان وقىعان تۇسىنىكتەرىن ايتىپ بەردى. ولارعا سىيلىق رەتىندە قوزى بەردىك. ولاردىڭ اتا- انالارى العاشىندا تۇسىنبەي حابارلاسىپ جاتقاندارى دا بولدى. «بالام ۇيگە قوزى جەتەكتەپ كەلدى. ونى ءسىز بەردى» دەپ ايتىپ جاتىر. «نە ءۇشىن بەرىلدى؟ « دەپ سۇراعاندارى دا بولدى. ال بۇعان دەيىن ءبىر- ءبىر تەلەفوندى قولىنا الىپ، كۇنى بويى شۇقشيىپ وتىراتىن اۋىل بالالارىنىڭ دەنى قازىر اۋىل كىتاپحاناسىن جاعالايتىن بولعان. ۋاقىت تاپقانى وسىندا وتىرىپ وقيدى، بولماسا ۇيگە الىپ كەتەدى. اياداي كىتاپحانادا 9 مىڭعا تارتا كىتاپ قورى بار.

ءاليا قويلىبەكوۆا، كىتاپحاناشى:

- وسى شارا باستالعالى وقىرماندار سانى كۇرت ارتا باستادى. 500 وقىرمان بولسا، سونىڭ 300 ءى بالالار. وسى جىلدا ولارعا 1 جارىم مىڭ كىتاپ تاراتتىق.

وسى ايدا جۇلدە قورى ودان دا قوماقتى بولماق. دەمەۋشىلەر قوزىنىڭ سانىن ارتتىرىپ وتىر. ودان بولەك كىتاپ قۇمار بالالارعا سىيلىق رەتىندە ۇيالى تەلەفون بەرۋدى دەپ جوسپارلاپ وتىرعاندارىن ايتادى. بالالاردىڭ وقىعان كىتابىن زەردەگە قالاي توقىعانىن انىقتاۋ ماقساتىندا ارنايى توپ قۇرىلعان. ونىڭ ىشىندە اۋىل ادامدارى مەن كىتاپحاناشى بار. قازىلاردىڭ قۇرامى ەندى اۋدانداعى كىتاپحانا قىزمەتكەرلەرىمەن تولىقپاق. بايقاۋ جاڭا وقۋ جىلى باستالعانعا دەيىن جالعاسادى.

جاندوس جۇمابەك، ەربولات ءابىش، قۋانىش ءابۋوۆ

www.24.kz