ۇلتتىق جوعارى وقۋ ورىندارىنا ءتۇسۋ تالابى قانداي
«بيىل 154 مىڭ تالاپكەر ۇلتتىق ءبىرىڭعاي تەستىلەۋدەن ءوتتى. ۇبت قورىتىندىسى بويىنشا شەكتى بالدى 103 مىڭنان استام ادام جينادى، بۇل - قاتىسۋشىلاردىڭ جالپى سانىنىڭ 67 پايىزى. بىلتىرعى ناتيجەمەن سالىستىرعاندا بۇل كورسەتكىش 7 پايىزعا جوعارى. بيىل ورتاشا بالل 66 نى قۇرادى»، - دەلىنگەن مينيسترلىك مالىمەتىندە.
ۇ ب ت قورىتىندىسى بويىنشا كەمىندە 65 بالل جيناعان تالاپكەرلەر ۇلتتىق جوعارى وقۋ ورىندارىنا، كەمىندە 50 بالمەن باسقا جوعارى وقۋ ورىندارىنا تۇسە الادى.
«بۇل رەتتە «پەداگوگيكالىق عىلىمدار» جانە «قۇقىق» ءبىلىم بەرۋ سالالارى بويىنشا شەكتى بالل كەمىندە 75 ءتى، «دەنساۋلىق ساقتاۋ» − كەمىندە 70 بالل، «اۋىل شارۋاشىلىعى جانە بيورەسۋرستار»، «ۆەتەريناريا» - كەمىندە 60 بالدى قۇرايدى»، - دەپ اتالىپ وتكەن ۆەدومستۆو حابارلاماسىندا.
گرانتتار تاعايىنداۋ جونىندەگى شەشىمدى رەسپۋبليكالىق كونكۋرستىق كوميسسيا قابىلدايدى. كونكۋرستىق كوميسسيانىڭ وتىرىسى 10 -تامىزعا دەيىن وتەدى. بۇدان بۇرىن حابارلانعانداي، 80 مىڭعا جۋىق تالاپكەر ءبىلىم گرانتتارىن تاعايىنداۋ كونكۋرسىنا قاتىسۋعا ءوتىنىش بەردى. ايتا كەتەيىك، 2022-2023 وقۋ جىلىندا باكالاۆرياتقا 73 مىڭعا جۋىق گرانت ءبولىندى. حالىقتىڭ الەۋمەتتىك وسال توپتارىنا بولىنەتىن گرانتتار سانى كوبەيتىلدى.
