رەسەي باسىلىمى «كانەلونى» جەڭەتىن قازاق بوكسشىنى اتادى

نۇر-سۇلتان. قازاقپارات - سپورت تۋرالى جازاتىن «چەمپيونات» پورتالىندا «ۋلۋچشەننايا ۆەرسيا گولوۆكينا» اتتى ماقالا جاريالاندى.

ماتەريالدا «كانەلونى» جەڭەتىن قازاق چەمپيونى شىققانى تۋرالى ايتىلادى. باسىلىم مالىمەتىنشە، جانىبەك ءالىمحان ۇلى ورتا سالماقتى جايپاپ ءوتىپ، ساۋل «كانەلو» الۆارەسكە جەتپەك، دەپ حابارلايدى Vesti.kz.

«ءبىز قازاق بوكسىنىڭ تۋىن جالعىز گەننادي گولوۆكين جەلبىرەتىپ جۇرگەنگە ۇيرەنىپ قالدىق. الايدا سول سالماقتا جاڭا جۇلدىز پايدا بولدى. ول جانىبەك ءالىمحان ۇلى. اۋەسقويداعى تاجىريبەسى جاقسى - الەم جانە ازيا چەمپيونى.

جانىبەك كاسىپقويداعى العاشقى جەكپە-جەگىندە GGG- ءدىڭ تيتۋل ءۇشىن ءبىرىنشى ايقاسىندا قارسىلاس بولعان كولۋمبيالىق ميلتون نۋنەسپەن جۇدىرىقتاستى. گولوۆكين ونى ءبىرىنشى راۋندتا ءبىرىنشى مينۋتتا قۇلاتقان ەدى. ال جانىبەك 2:25 سەكۋند ۋاقىت كەتىردى. باستاماسى جامان ەمەس.

كاسىپقويداعى ەكىنشى جەكپە-جەگىنەن باستاپ قازاقستاندىق بەلگىلى مەنەدجەر ەگيس كليماسپەن جۇمىس جاساپ، Top Rank كومپانياسىمەن كەلىسىمشارتقا وتىردى. ال باپكەرى اتاقتى باددي ماكگيرت.

مامىردا ول WBO ۇيىمىنىڭ ۋاقىتشا چەمپيونى اتاندى. ديۆيزيونداعى مىقتىلار جانىبەكتى نازارىنا الۋ كەرەك، ويتكەنى ول گولوۆكيننىڭ سوققى كۇشى مەن «كانەلونىڭ» تەحنيكاسىن بويىنا قوسا سىڭىرگەن. ال جانىبەكتىڭ ۇلگى تۇتاتىن بوكسشىسى گولوۆكين ەمەس، 1980-جىلعى وليمپيادانىڭ كۇمىس جۇلدەگەرى سەرىك قوناقبايەۆ ەكەنىن ايتا كەتەيىك.

قازىر ول دەمەتريۋس اندرادەگە تيەسىلى WBO چەمپيوندىعىنا باستى ۇمىتكەر. ۇيىم امەريكالىقتى جانىبەكپەن جەكپە-جەككە مىندەتتەدى. ارى قاراي نە بولاتىنى كورەيىك»، - دەپ جازادى باسىلىم.