16:27, 24 - شىلدە 2022 | GMT +5
پرەزيدەنت ساۋد ارابياسى ينۆەستورلارىنا ترانسكاسپي باعدارىن ءارتاراپتاندىرۋدى ۇسىندى
نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ ساۋد ارابياسىنا رەسمي ساپارى اياسىندا ىنتىماقتاستىقتى كەڭەيتۋدىڭ مەيلىنشە پەرسپەكتيۆتى سالالارىن بەلگىلەپ بەردى.

ەڭ الدىمەن، بۇل ەكىجاقتى ساۋدا-ساتتىققا قاتىستى، دەپ حابارلايدى اقوردانىڭ باسپا ءسوز قىزمەتى.
- ءبىز جۇرگىزگەن تالداۋعا سايكەس قازاقستان ماشينا جاساۋ، شويىن جانە بولات ءوندىرىسى، سونداي-اق تاماق ونەركاسىبى مەن اۋىل شارۋاشىلىعى سياقتى سالالار بويىنشا قۇنى شامامەن جىلىنا 400 ميلليون دوللار بولاتىن شيكىزات تاۋارلارىنىڭ 100 دەن استام ءتۇرىن ۇسىنا الادى، - دەدى پرەزيدەنت.
قاسىم-جومارت توقايەۆ قىتاي، قازاقستان، ازەربايجان، گرۋزيا جانە تۇركيا اراسىن جالعاستىراتىن كولىك-ترانزيت جانە لوگيستيكالىق مۇمكىندىكتەردى، سونىڭ ىشىندە ترانسكاسپي باعدارىن ءارتاراپتاندىرۋدى جانە كەڭەيتۋدى ەكىنشى ماڭىزدى باعىت رەتىندە اتاپ ءوتتى.