تەننيسشى دەنيس ەۆسەيەۆ پرەزيدەنت كۋبوگىنىڭ فينالىنا ءوتتى

نۇر-سۇلتان. قازاقپارات - ەلوردادا ەرلەر مەن ايەلدەر اراسىندا پرەزيدەنت كۋبوگىنىڭ فينالىنا شىققان تەننيسشىلەر انىقتالدى، دەپ حابارلايدى قازاقپارات ءتىلشىسى.

قازاقستان تەننيس فەدەراتسياسىنان ءمالىم ەتكەنىندەي، دەنيس ەۆسەيەۆ ءوز سپورتتىق جولىندا العاش رەت چەللەندجەر تۋرنيرىنىڭ فينالىنا جولداما الدى.

د. ەۆسەيەۆ جارتىلاي فينالدا وتانداسى بەيبىت جۋكايەۆتى 6:4، 6:4 ەسەبىمەن ۇتتى.

ءار پارتيادا دەنيس ءبىر-بىردەن برەيك جاسادى.

د. ەۆسەيەۆ جەكسەنبى كۇنى فينالدا جارىستىڭ ءبىرىنشى راكەتكاسى، رەسەيلىك رومان سافيۋللينمەن باس جۇلدەنى ساراپقا سالادى.

ر. سافيۋللين جارتىلاي فينالدا تاعى ءبىر قازاقستاندىق دميتري پوپكودان ايلاسىن اسىردى - 6:3، 6:2.

پرەزيدەنت كۋبوگى اياسىندا ايەلدەر اراسىندا ITF M60 دوداسىندا سوڭعى باسەكەدە جاپونيالىق مويۋكا ۋچيدجيما مەن سەربيالىق ناتاليا ستەفانوۆيچ كەزدەسەدى.

ەسكە سالا كەتەيىك، بۇدان بۇرىن العاش رەت ءۇش قازاقستاندىق تەننيسشىنىڭ پرەزيدەنت كۋبوگىنىڭ جارتىلاي فينالىنا شىققانىن جازعان بولاتىنبىز.