د د س ۇ مايمىل شەشەگىنىڭ ءورشۋىن جاھاندىق توتەنشە جاعداي دەپ جاريالادى

دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، قازىر 75 ەلدە اتالعان اۋرۋعا 16 مىڭنان استام ادام شالدىعىپ، 5 ادام كوز جۇمعان.
«ءبىز از زەرتتەگەن بۇل دەرت بۇكىل الەمگە تەز تاراپ كەتتى. سوندىقتان مايمىل شەشەگى جاھاندىق قوعامدىق دەنساۋلىق ساقتاۋداعى توتەنشە جاعداي دەپ ەسەپتەيمىن»، - دەدى ۇيىم باسشىسى تەدروس گەبرەيەسۋس.
قازىر د د س ۇ ىندەتتى جاھاندىق دەنساۋلىققا قاۋىپ رەتىندە قاراستىرادى، سوندىقتان ۆيرۋستىڭ ودان ءارى تارالۋىن جانە ىقتيمال پاندەميانىڭ الدىن الۋ ءۇشىن كەلىسىلگەن حالىقارالىق ارەكەت قاجەت.
قاۋىپتىڭ بۇل دەڭگەيى ەلدەردىڭ ۇكىمەتتەرىنە مىندەتتى تالاپتار قويمايدى، ءبىراق شۇعىل ارەكەتكە شاقىرادى.
دۇنيەجۇزىلىك دەنساۋلىق ساقتاۋ ۇيىمى وزىنە مۇشە مەملەكەتتەرگە تەك نۇسقاۋلار مەن كەڭەس بەرە الادى جانە جاھاندىق دەنساۋلىققا قاۋىپ توندىرەتىن جاعدايلار تۋرالى حابارلاۋعا مىندەتتى.
د د س ۇ باعالاۋى بويىنشا، مايمىل شەشەگىنىڭ تارالۋ قاۋپى جاھاندىق دەڭگەيدە ورتاشا. ال ەۋروپا جەرىندە قاۋىپ جوعارى بولىپ وتىر.