فۋتبولدان ءبىرىنشى ليگادا «وقجەتپەس» كوش باستادى

نۇر-سۇلتان. قازاقپارات - فۋتبولدان ءبىرىنشى ليگا كوماندالارى اراسىنداعى قازاقستان بىرىنشىلىگىنىڭ ون ءۇشىنشى تۋرى مارەسىنە جەتتى، دەپ حابارلايدى قازاقپارات ءتىلشىسى.

كوش باسىندا كەلە جاتقان كوكشەتاۋدىڭ «وقجەتپەسى» بۇگىن سىرت الاڭدا پاۆلودار وبلىسىنىڭ «ەكىباستۇز» كومانداسىن 1:0 ەسەبىمەن ءسۇرىندىردى.

ناتيجەسىندە تۋرنير كەستەسىندە 31 ۇپايمەن ءبىرىنشى ورنىن ساقتاپ قالدى. ودان كەيىنگى ورىنداعى شىمكەنتتىڭ «قىرانى» الماتىدا «قايرات-جاستاردى» 3:0 ەسەبىمەن ويسىراتا جەڭدى.

اتالعان كلۋب 29 ۇپايمەن ەكىنشى ورىنعا ورنىقتى. سونداي-اق، جامبىل وبلىسىنىڭ «تاراز-قاراتاۋ» كلۋبى سول ءوڭىردىڭ تاعى ءبىر وكىلى «يگىلىكتى» 1:0، ەلوردالىق «جەڭىس» قاراعاندىلىق «شاحتەر- بولاتتى» 4:1، «استانا جاستار» قىزىلوردالىق «بايقوڭىردى» 3:1، شىمكەنتتىك «اكادەميا وڭتۇستىك» تۇركىستاندىق «ياسسىنى» 3:2 ەسەبىمەن جەڭدى.

اتالعان تۋرداعى تاعى ءبىر ويىندا 12- شىلدەدە تالدىقورعاننىڭ «جەتىسۋى» قىزىلوردالىق «قايساردان» 2:1 ەسەبىمەن باسىم تۇسكەن ەدى.

ەندى 14-تۋر ويىندارى 30-31- شىلدە جانە 24- تامىز كۇندەرى وتەدى.