«اتىراۋ» «ورداباسىدان» جەڭىلگەننەن كەيىن جانكۇيەرلەر ستاديوندا شۋ شىعاردى
وسىعان بايلانىستى فۋتبول جانكۇيەرلەرى جەرگىلىكتى كومانداعا نارازىلىق ءبىلدىردى، دەپ حابارلايدى قازاقپارات.
«اتىراۋ» كومانداسى فۋتبولدان قازاقستان كۋبوگىنىڭ توپتىق كەزەڭىندە قايتا-قايتا جەڭىلىپ ءجۇر. سوڭعى كەزدەسۋدە - «ورداباسى» كومانداسىمەن وتكەن ماتچتا تاعى دا جەڭىلدى. جەرگىلىكتى كوماندانىڭ ويسىراي ۇتىلۋى فۋتبول جانكۇيەرلەرىنىڭ نارازىلىعىن تۋعىزدى.
«ءبىز بيۋجەتتەن بولىنگەن قاراجاتتىڭ بۇلايشا جەلگە ۇشقانىن قالامايمىز. جەرگىلىكتى كوماندا نەگە جەڭىلە بەرەدى؟ بۇلاي جالعاسا بەرسە، فۋتبول كلۋبى لەگيونەرلەردەن «تازارتىلعانىن» تالاپ ەتەمىز. لەگيونەرلەردىڭ ورنىنا جەرگىلىكتى جاس فۋتبولشىلار ويناسىن. ولار ارينە، جەڭىسكە جەتۋ ءۇشىن بارىن سالادى. تاجىريبە جينايدى. ءبىزدىڭ لەگيونەرلەردەن قۇرالعان كوماندا ەمەس، ءوز فۋتبول كلۋبىمىز بولۋى كەرەك»، - دەپ نارازىلىق ءبىلدىردى فۋتبول كلۋبىنىڭ جانكۇيەرلەرى.
«اتىراۋ» فۋتبول كلۋبىنىڭ باس باپكەرى كونستانتين گوروۆەنكو «ورداباسى» كومانداسىمەن وتكەن ماتچقا قاتىستى پىكىرىن ءبىلدىردى.
«بۇل ويىن ءبىز ويلاعانداي ناتيجەلى بولمادى. ءوز الاڭىمىزدا 1:4 ەسەبىمەن ۇتىلدىق. كوماندانىڭ فۋتبولشىلارى مەن جاتتىقتىرۋشىلار شتابىنا ويلانۋ كەرەك شىعار. مۇنداي ناتيجەسىز ويىن ءۇشىن جاۋاپكەرشىلىكتى ءوز موينىما الامىن. مەن كوماندا فۋتبولشىلارىنا ولاردان نە كۇتەتىنىمدى، قالاي ويناۋ قاجەتتىگىن جەتكىزە المادىم. كوماندا ويىنشىلارىندا كوشباسشىلىق قاسيەت جەتىسپەدى. الاڭدا جەڭىسكە جەتۋگە دەگەن ىنتانى كورمەدىم. فۋتبولدى ءدال وسىلاي وينامايدى»، - دەدى كونستانتين گوروۆەنكو.
