قازاقستاندا بايلانىس ستانسالارىن ورناتۋ ەرەجەسى قايتا قارالادى

نۇر-سۇلتان. قازاقپارات - راديوفوبياسى بار وتانداستارىمىزدىڭ قامىن ويلاي وتىرىپ، ەلىمىزدە بازالىق بايلانىس ستانسالارىن ورناتۋ ەرەجەسىن قايتا قاراۋ جوسپارلانىپ جاتىر.

بۇل تۋرالى ق ر پارلامەنتى ءماجىلىسىنىڭ دەپۋتاتى ەكاتەرينا سمىشليايەۆا ءمالىم ەتتى، دەپ حابارلايدى قازاقپارات ءتىلشىسى.

«ءبىزدىڭ باستامامەن قولعا الىناتىن جاڭا زاڭ جوباسى بازالىق بايلانىس ستانسالارىن ورناتۋ ەرەجەلەرىنە قاتىستى بولماق. بازالىق ستانسالاردى ورناتۋعا قاتىستى قوعامدا ءبىرىڭعاي پىكىر مەن ناقتى ۇستانىم جوق. سوندىقتان اتالعان نورمانى قوعام بەلسەندىلەرىمەن تالقىلاپ، كوپشىلىككە تۇسىندىرەتىن بولامىز. بۇل جەردە ماسەلە راديوفوبياسى بار ازاماتتارعا تىكەلەي قاتىستى بولىپ تۇر. بايلانىس قىزمەتىن ءبارىمىز پايدالانامىز، سوندىقتان ماسەلەنى ارتىق شۋ مەن داۋ-دامايعا جەتكىزبەۋ كەرەك»، - دەدى ەكاتەرينا سمىشليايەۆا «AMANAT» پارتياسى الاڭىندا وتكەن باسپا ءسوز ءماسليحاتىندا.

حالىق قالاۋلىسىنىڭ مالىمدەۋىنشە، بۇگىندە راديوفوبيا - بۇكىل الەمدە بار ماسەلە.

«ءيا، راديوفوبياعا قاتىستى ءتۇرلى پىكىرلەر بار. ونىڭ بازالىق بايلانىس ستانساسىنان كەلەتىن زيان كوپ دەۋشىلەر دە تابىلىپ جاتىر. دەسەك تە ستانسادان كەلەتىن زياننان ءبىز قولدانىپ جۇرگەن ەلەكترونيكا قۇرالدارىنان كەلەتىن زياننىڭ بىرنەشە ەسە ارتىق ەكەنى ايتىلعان عىلىمي دالەلدەمە بار»، - دەيدى ول.

ەسكە سالا كەتسەك، ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين تۇرعىنداردىڭ راديوفوبياسى بايلانىس ساپاسىن ارتتىرۋعا كەدەرگى كەلتىرىپ وتىرعانىن مالىمدەگەن ەدى.

ونىڭ ايتۋىنشا، ءبىر-ەكى تۇرعىننىڭ شاعىمىنا بايلانىستى ماماندار ءۇيدىڭ شاتىرىنداعى بازالىق بايلانىس ستانساسىن الىپ تاستاۋعا ءماجبۇر.